ກະຊວງສຶກສາທິການແລະ ກິລາ ຊ່ວຍເຫລືອຄູ ຜູ້ປະສົບໄພພິບັດຢູ່ເມືອງສະໜາມໄຊ ເບື້ອງຕົ້ນ 67 ລ້ານກີບ

0
986

ກະຊວງສຶກສາທິການ ແລະ ກິລາ ໄດ້ເອົາໃຈໃສ່ ໃຫ້ການຊ່ວຍເຫລືອບັນເທົາທຸກ ພະນັກງານ ຄູ-ອາຈານ ຜູ້ທີ່ໄດ້ຮັບຜົນກະທົບຈາກໄພພິບັດນ້ຳຖ້ວມ ຢູ່ເມືອງສະໜາມໄຊ ແຂວງ ອັດຕະປື ໃນຄືນວັນທີ 23 ກໍລະກົດ 2018 ທີ່ຜ່ານມານີ້ ຢ່າງທັນກັບສະພາບການ ທັງເປັນເຄື່ອງອຸປະໂພກ-ບໍລິໂພກ ແລະ ເງິນສົດ, ສະເພາະເງິນສົດ ທີ່ຊ່ວຍເຫລືອໃນເບື້ອນຕົ້ນຈຳນວນ 67 ລ້ານກີບ, ນັກງານລັດຖະກອນຄູ-ອາຈານ ທີ່ໄດ້ຮັບຜົນກະທົບໃນເຫດການຄັ້ງນີ້ ມີ 67ຄົນ ສະເລ່ຍ ຜູ້ລະ 1 ລ້ານກີບ.


ພິທີການມອບ-ຮັບ ເງິນຊ່ວຍເຫລືອບັນເທົາທຸກຄັ້ງນີ້ ໄດ້ມີຂື້ນຢູ່ ໃນຕອນບ່າຍທີ 28 ສິງຫາ 2018 ນິ້ ຫ້ອງການສຶກສາທິການ ແລະ ກິລາເມືອງສະໜາມໄຊ ໂດຍແມ່ນ ທ່ານ ຄຳພັນ ຄຳອ່ອນ ຮອງຫົວໜ້າກົມສ້າງຄູ ກະຊວງສຶກສາທິການ ແລະ ກິລາ ແລະ ທ່ານ ສຸພີ ເພັດດາວົງ ຫົວໜ້າພະແນກກວດກາ, ຕິດຕາມ ແລະ ປະເມີນຜົນ ກົມສ້າງຄູ ເປັນຜູ້ຕາງໜ້າໃຫ້ກະຊວງສຶກສາທິການ ແລະ ກິລາ ນໍາເງິນຊ່ວຍເຫລືອຈໍານວນດັ່ງກ່າວມາມອບໃຫ້ກັບຜູ້ປະສົບໄພຢ່າງເຖິງທີ່, ໂດຍມີທ່ານ ຄໍາພູນ ແກ້ວມາລາ ຫົວໜ້າພະແນກສຶກສາທິການ ແລະ ກິລາ ແຂວງ, ພ້ອມດ້ວຍຄະນະ, ທ່ານ ບົງແກ້ວ ສິນນະຄອນ ຫົວໜ້າຫ້ອງການສຶກສາທິການ ແລະ ກິລາເມືອງສະໜາມໄຊ ພ້ອມດ້ວຍຄະນະ ແລະ ພ້ອມດ້ວຍພາກສ່ວນທີ່ກ່ຽວຂ້ອງ ເຂົ້າຮ່ວມເປັນສັກຂີພະຍານ.


ໃນພິທີດັ່ງກ່າວ ທ່ານ ຄໍາພັນ ຄໍາອ່ອນ ໄດ້ກ່າວວ່າ: ສຳລັບເງິນ ຈຳນວນ 67 ລ້ານກີບ, ແມ່ນຈັດແບ່ງຕາມຕົວເລກ ຄູຜູ້ທີ່ຖືກຜົນກະທົບ ຈຳນວນ 67 ຄົນ ທີ່ຫ້ອງການສຶກສາທິການ ແລະ ກິລາ ເມືອງສະໜາມໄຊ ລາຍງານໃຫ້ກະຊວງສຶກສາ ແລະ ການມອບເງິນຊ່ວຍເຫລືອຄັ້ງນີ້ ສຳເລັດໄດ້ 42 ຄົນ ສ່ວນຈໍານວນເງິນທີ່ຍັງເຫລືອ ແມ່ນໄດ້ມອບໃຫ້ ຄະນະຫ້ອງການສຶກສາທິການ ແລະ ກິລາເມືອງ ເປັນຜູ້ນຳໄປມອບໃຫ້ກັບຄູ ຜູ້ທີ່ບໍ່ສາມາດມາຮັບເອົາເອງໄດ້ ເນື່ອງຈາກສູນພັກຊົ່ວຄາວຢູ່ຫ່າງໄກ ໃນມື້ຕໍ່ໜ້າຢ່າງຮິບດ່ວນ.

LEAVE A REPLY

Please enter your comment!
Please enter your name here