ນໍ້າເທີນ 2 ໄດ້ຢຸດຕິການຜະລິດໄຟຟ້າ ແລະ ຢຸດການປ່ອຍນໍ້າ ຕັ້ງແຕ່ວັນທີ15 ສິງຫາ ເພື່ອບໍ່ໃຫ້ກະທົບຕໍ່ລະດັບນໍ້າເຊບັ້ງໄຟ

0
2776

ເນື່ອງຈາກປະຈຸບັນຝົນຕົກຕໍ່ເນື່ອງຢູ່ຕອນເທິງນໍ້າເຊບັ້ງໄຟ ແລະ ລະດັບນໍ້າເຊບັ້ງໄຟເລີ່ມສູງຂຶ້ນທາງບໍລິສັດນໍ້າເທີນ 2 ຈິ່ງໄດ້ຢຸດການຜະລິດໄຟ ແລະ ຢຸດການປ່ອຍນໍ້າລົງສູ່ຄ່ອງນໍ້າເຊບັ້ງໄຟ ເພື່ອປະຕິບັດຕາມສັນຍາສຳປະທານລະຫວ່າງບໍລິສັດໄຟຟ້າເທີນ 2 ແລະ ລັດຖະບານລາວ. ໃນສັນຍາທີ່ກໍານົດໄວ້ຄື: ໂຄງການໄຟຟ້ານໍ້າເທີນ 2 ຈະຕ້ອງລຸດອັດຕາການປ່ອຍນ້ຳລົງສູ່ນ້ຳເຊບັ້ງໄຟເມື່ອອັດຕາການໄຫລຂອງນ້ຳເຊຢູ່ເມືອງມະຫາໄຊຂຶ້ນຮອດລະດັບ 14,4 ແມັດ.


ໃນວັນທີ 15 ສິງຫາ 2018 ຄະນະນໍາຂອງແຂວງ, ອໍານາດການປົກຄອງເມືອງ ນຳໂດຍ ທ່ານ ນາງ ດາລຸນີ ພະຄຸນທອງ ຮອງຫົວໜ້າພະແນກແຮງງານ ແລະ ສະຫວັດດີການສັງຄົມແຂວງ, ຫົວໜ້າຫ້ອງການແຮງງານ ແລະ ສະຫວັດດີການສັງຄົມເມືອງ ແລະ ອຳນາດການປົກຄອງບ້ານຈາກ ເມືອງ ຍົມມະລາດ, ມະຫາໄຊ, ເຊບັ້ງໄຟ, ໜອງບົກ  ແຂວງຄຳມ່ວນ ແລະ ເມືອງ ໄຊບູລີ ( ແຂວງສະຫວັນນະເຂດ ) ແລະ ສື່ມວນຊົນທ້ອງຖິ່ນຂອງແຂວງ ໄດ້ລົງເຄື່ອນໄຫວຢ້ຽມຢາມເຮືອນຈັກ ເພື່ອຢັ້ງຢືນກ່ຽວກັບການຢຸດການປ່ອຍນໍ້າ ແລະ ຢຸດທຳການຜະລິດໄຟຟ້າຊົ່ວຄາວຂອງໂຄງການຜະລິດໄຟຟ້ານໍ້າເທີນ 2  ນຳໄປເຜີຍແຜ່ໂຄສະນາໃຫ້ປະຊາຊົນບ້ານເປົ້າໝາຍລຽບຕາມແຄມນໍ້າເຊບັ້ງໄຟຮັບຮູ້ສະພາບ.

ທ່ານ ດຣ. ດູສິດ ພົມມະ ຈັນ ອຳນວຍການເຂື່ອນ ຍັງໄດ້ໃຫ້ສຳພາດເຖິງຈຸດປະສົງໃນການຢຸດການຜະລິດໄຟຟ້າ ແລະ ຢຸດການປ່ອຍນໍ້າຄັ້ງນີ້ ແມ່ນເປັນຄັ້ງທີ 2 ໃນຮອບປີ, ຄັ້ງທີ 1 ແມ່ນຢຸດແຕ່ກາງຄືນຂອງວັນທີ 24 ກໍລະກົດ ຫາ 9 ສິງຫາ ຈິ່ງໄດ້ທຳການຜະລິດຄືນ.

ເນື່ອງຈາກໃນວັນທີ 12 – 13 ສິງຫາຜ່ານມາໄດ້ມີຝົນຕົກໜັກຢູ່ຕອນເທິງຂອງເຊບັ້ງໄຟເຮັດໃຫ້ນໍ້າເຊບັ້ງໄຟໄດ້ສູງຂຶ້ນ ດັ່ງນັ້ນພວກເຮົາຈິ່ງໄດ້ຢຸດເຄື່ອງຈັກແຕ່ຕອນທ່ຽງຄືນຂອງວັນທີ 14 ແລະ ຢຸດການປ່ອຍນໍ້າເລີ່ມແຕ່ເວລາ 4 : 00 ໂມງເຊົ້້າຂອງວັນທີ 15 ສິງຫາ 2018.

 

ປະຈຸບັນຄ່ອງສົ່ງນໍ້າແມ່ນບໍ່ມີນໍ້າຈາກການຜະລິດ, ມີແຕ່ນໍ້າທີ່ໄຫລຈາກແມ່ນໍ້າທຳມະຊາດ ແລະ ອ້ອມແອ້ມເຂດເຂື່ອນດັດສົມນໍ້າເທົ່ານັ້ນ. ສະເພາະເຂື່ອນນາກາຍຕັ້ງແຕ່ວັນທີ 30 ກໍລະກົດ ນໍ້າໄດ້ເຕັມອ່າງແລ້ວ ແລະ ຮອດລະດັບທີ່ຈະຕ້ອງໄດ້ປ່ອຍນໍ້າປົກກະຕິໂດຍໄດ້ມີຂັ້ນຕອນການປ່ອຍນໍ້າອອກເຊິ່ງໄດ້ແຈ້ງການເຖິງເມືອງທີ່ກ່ຽວຂ້ອງໂດຍສະເພາະເມືອງຄຳເກີດ ແຂວງບໍລິຄຳໄຊ, ໄດ້ມີຂັ້ນຕອນການປ່ອຍນໍ້າ, ມີການປະສານງານພາກສ່ວນກ່ຽວຂ້ອງ ເພື່ອລຸດຜ່ອນຜົນກະທົບທາງເບື້ອງລຸ່ມຂອງເຂື່ອນ.

ແຕ່ຄວາມຈິງແລ້ວເຂື່ອນຍັງສາມາດຮັບຮອງນໍ້າໄດ້ອີກ. ປະຈຸບັນແມ່ນປ່ອຍປົກກະຕິປ່ອຍຢູ່ປະມານ 2.000 ແມັດກ້ອນ/ວິນາທີ, ນໍ້າໄຫລເຂົ້າສູງສຸດແມ່ນ 3.000 ແມັດກ້ອນ/ວິນາທີ, ອັດຕາການໄຫລເຂົ້າແມ່ນຫລຸດລົງແຕ່ກະຈະຄ່ອຍໆ ປ່ອຍນໍ້າອອກ ເພື່ອດຶງນໍ້າລົງມາໃນລະດັບທີ່ວ່ານໍ້າເຕັມອ່າງ ຫລື ຕໍ່າກ່ອນອ່າງ ເພື່ອຮອງຮັບຈາກພາຍຸລູກໃໝ່ທີ່ມາເຖິງໃນທ້າຍອາທິດນີ້.


ສ່ວນສາຍເຫດນໍ້າຖ້ວມເກີດຈາກການປ່ອຍເຂື່ອນ ແລະ ກ່ຽວກັບຫາງສຽງທີ່ວ່າປິດແຕ່ກາງເວັນຮອດກາງຄືນພັດປ່ອຍນັ້ນທາງບໍລິສັດຂໍຢັ້ງຢືນວ່າບໍ່ເປັນຄວາມຈິງໃຫ້ໜັ້ນໃຈໄດ້ວ່າທາງບໍລິສັດແມ່ນໄດ້ປະຕິບັດຕາມລະບຽບ ແລະ ສັນຍາສຳປະທານຢ່າງເຂັ່ງຂັດ. ທ່ານ ດຣ. ດູສິດ ພົມມະ ຈັນ ຄາດວ່າຈະເລີ່ມແລ່ນເຄື່ອງຈັກຜະລິດໄຟໄຟ້າ ແລະ ປ່ອຍນໍ້າກໍ່ຕໍ່ເມືອແມ່ນໍ້າເຊບັ້ງໄຟໄດ້ຫລຸດລົງ. ທັງນີ້ກໍ່ເພື່ອຄວາມປອດໄພຂອງພໍ່ແມ່ປະຊາຊົນທີ່ຕັ້ງລຽບຕາມແຄມແມ່ນໍ້າເຊບັ້ງໄຟ.

ຂ່າວ : ມະນີວັນ

LEAVE A REPLY

Please enter your comment!
Please enter your name here