ເຊັນບົດບັນທຶກຄວາມເຂົ້າໃຈ ວ່າດ້ວຍການສຶກສາຄວາມເປັນໄປໄດ້ ດ້ານການພັດທະນາສາຍສົ່ງແຫ່ງຊາດ

0
1745

ໃນຕອນແລງຂອງວັນທີ 8 ສິງຫາ 2018 ຢູ່ທີ່ໂຮງແຮມດອນຈັນພາເລັດ, ນະຄອນຫຼວງວຽງຈັນ ໄດ້ຈັດພິທີເຊັນບົດບັນທຶກຄວາມເຂົ້າໃຈ ວ່າດ້ວຍການສຶກສາຄວາມເປັນໄປໄດ້ ດ້ານການພັດທະນາສາຍສົ່ງແຫ່ງຊາດ ລະຫວ່າງ ລັດຖະບານ ແຫ່ງ ສປປ ລາວ, ລັດວິສາຫະກິດໄຟຟ້າລາວ ແລະ ລັດວິສາຫະກິດຕາຂ່າຍໄຟຟ້າ ພາກໃຕ້ຂອງ ສປ ຈີນ. ໂດຍການໃຫ້ກຽດເຂົ້າຮ່ວມຂອງ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ມີບັນດາທ່ານລັດຖະມົນຕີ, ບັນດາຮອງລັດຖະມົນຕີ, ເອກອັກຄະລັດຖະທູດ ສປ ຈີນ ປະຈໍາ ສປປ ລາວ, ປະທານບໍລິສັດສາຍສົ່ງໄຟຟ້າພາກໃຕ້ຂອງ ສປ ຈີນ ພ້ອມດ້ວຍແຂກຖືກເຊີນ ແລະ ພະນັກງານທີ່ກ່ຽວຂ້ອງ ເຂົ້າຮ່ວມເປັນສັກຂີພິຍານ.


ໃນພິທີ, ທ່ານ Li Qingkui ປະທານບໍລິສັດ ລັດວິສາຫະກິດສາຍສົ່ງໄຟຟ້າພາກໃຕ້ ໄດ້ກ່າວວ່າ: ໂຄງການສາຍສົ່ງໄຟຟ້າ ແມ່ນໂຄງການໜຶ່ງ ທີ່ມີຄວາມສໍາຄັນ ແລະ ສະແດງເຖິງຄວາມຕັດສິນໃຈສູງ ຂອງລັດຖະບານລາວ ທີ່ມີເປົ້າໝາຍສ້າງໃຫ້ຂະແໜງພະລັງງານເປັນທ່າແຮງສໍາຄັນ ໃນການພັດທະນາເສດຖະກິດ-ສັງຄົມຂອງປະເທດ, ເຊິ່ງການເຊັນບົດບັນທຶກຄວາມເຂົ້າ ໃຈໃນຄັ້ງນີ້ ແມ່ນເປັນການຢັ້ງຢືນເຖິງ ຄວາມເຊື່ອໝັ້ນຂອງລັດຖະບານ ຕໍ່ບໍລິສັດສາຍສົ່ງໄຟຟ້າພາກໃຕ້ຂອງ ສປ ຈີນ ແລະ ເພື່ອເປັນການຮັບປະກັນ ດ້ານການສະໜອງພະລັງງານໄຟຟ້າທ່ີ່ປອດໄພ, ເປັນມິດກັບສິ່ງແວດລ້ອມ ແລະ ມີຄຸນນະພາບສູງ ໃຫ້ແກ່ການພັດທະນາເສດຖະກິດ-ສັງຄົມ ທັງເປັນການຍົກສູງຊີວິດການເປັນຢູ່ ຂອງປະຊາຊົນລາວ, ໃນນາມບໍລິສັດສາຍສົ່ງໄຟຟ້າພາກໃຕ້ ສປ ຈີນ ຢັ້ງຢືນວ່າ ຈະປະຕິບັດຕາມເນື້ອໃນຈິດໃຈ ຂອງບົດບັນທຶກຄວາມເຂົ້າໃຈ ແລະ ຈະໃຫ້ການຮ່ວມມືກັບ ລັດວິສາຫະກິດໄຟຟ້າລາວ ເພື່ອສ້າງແຜນຕາຂ່າຍສາຍສົ່ງໄຟຟ້າແຫ່ງຊາດ ໃຫ້ສໍາເລັດໂດຍໄວ ເພື່ອນໍາເອົາຜົນປະໂຫຍດມາສູ່ປະຊາຊົນລາວ ຢ່າງແທ້ຈິງ.

ພິທີເຊັນບົດບັນທຶກຄວາມເຂົ້າໃຈ ໃນຄັ້ງນີ້, ຕາງໜ້າລັດຖະບານລາວ ເຊັນໂດຍ ທ່ານ ສຸພັນ ແກ້ວມີໄຊ ລັດຖະມົນຕີກະຊວງແຜນການ ແລະ ການລົງທຶນ; ຕາງໜ້າຝ່າຍຈີນເຊັນໂດຍ ທ່ານ Li Qingkui ປະທານບໍລິສັດລັດວິສາຫະກິດສາຍສົ່ງໄຟ ຟ້າພາກໃຕ້ ສປ ຈີນ. ໃນໂອກາດດຽວກັນນີ້, ບໍລິສັດສາຍສົ່ງໄຟຟ້າພາກໃຕ້ ສປ ຈີນ ຍັງໄດ້ມອບເງິນ ຈໍານວນ 1,200,000,000 ກີບ ໃຫ້ກະຊວງແຮງງານ ແລະ ສະຫວັດດີການສັງຄົມ ເພື່ອປະກອບສ່ວນເຂົ້າໃນການ ​ຊ່ວຍເຫຼືອຜູ້ປະສົບໄພພິບັດ ຢູ່ທີ່ເມືອງສະໜາມໄຊ, ແຂວງອັດຕະປື ຕື່ມອີກ.

ແຫລ່ງ: ຫ້ອງວ່າການສໍານັກງານນາຍົກລັດຖະມົນຕີ

LEAVE A REPLY

Please enter your comment!
Please enter your name here