ທ່ານສອນໄຊ ສີພັນດອນລົງຢ້ຽມຢາມພື້ນຖານໂຄງລ່າງການສື່ສານຮັບໃຊ້ການນຳ

0
793

ໃນຕອນເຊົ້າ ຂອງວັນທີ 9 ສິງຫາ 2018 ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ໄດ້ໄປຢ້ຽມຢາມ ໂຄງການສື່ສານ ຮັບໃຊ້ການນຳ ແລະ ພາກລັດບໍລິຫານ, ກະຊວງປ້ອງກັນປະເທດ ເພື່ອເບິ່ງຄວາມເປັນໄປໄດ້ ໃນການຂະຫຍາຍສາຍໄຍແກ້ວ ໄປສູ່ເມືອງສະໜາມໄຊ ແຂວງອັດຕະປື ໂດຍມີທ່ານພັນໂທ ສຸບັນ ພັນທະວີ ຫົວໜ້າໂຄງການດັ່ງກ່າວ ພ້ອມດ້ວຍຄະນະ ໃຫ້ການຕ້ອນຮັບ.

ໃນໂອກາດນີ້, ທ່ານຮອງນາຍົກລັດຖະມົນຕີ ໄດ້ຮັບຟັງ ການລາຍງານຫຍໍ້ ກ່ຽວກັບການຈັດຕັ້ງ ແລະ ການເຄື່ອນໄຫວວຽກງານ ພາຍໃນຄວາມຮັບຜິດຊອບ ຂອງໂຄງການ ໂດຍສະເພາະແມ່ນ ການຈັດຕັ້ງປະຕິບັດວຽກງານ ເຕັກໂນໂລຊີສື່ສານ ແລະ ຂໍ້ມູນຂ່າວສານ (ICT) ຈາກທ່ານພັນໂທ ສຸບັນ ພັນທະວີ ເຊິ່ງເຫັນວ່າ: ໂຄງການສື່ສານ ຮັບໃຊ້ການນໍາ ສ້າງຕັ້ງຂຶ້ນໃນລະຫວ່າງ ປີ 1999 ຫາ 2000 ມີໜ້າທີ່ ພັດທະນາລະບົບ ໂທລະຄົມມະນາຄົມ ຕິດພັນກັບຄວາມໝັ້ນຄົງ; ພັດທະນາລະບົບ ໂທລະຄົມມະນາຄົມ ທາງດ້ານເສດຖະກິດ ຮັບໃຊ້ສາທາລະນະ ແລະ ດໍາເນີນເສດຖະກິດ ຕາມກົນໄກການຕະຫຼາດ ເພື່ອສ້າງຄວາມເຂັ້ມແຂງ ໃຫ້ບໍລິສັດ ລັດສະກາຍ ໂທລະຄົມ. ໃນນັ້ນ, ພື້ນຖານໂຄງລ່າງ ທີ່ໂຄງການສາມາດ ດຳເນີນການເຄື່ອນໄຫວ ຢ່າງເປັນປົກກະຕິ ໃນປະຈຸບັນ ປະກອບດ້ວຍ ລະບົບຕ່າງໆ ເປັນຕົ້ນ ລະບົບສາຍໄຍແກ້ວ, ລະບົບເຄື່ອງສົ່ງ, ສະຖານີ, ສູນກາງອິນເຕີເນັດ, ສູນກາງໂທ ລະສັບໄອພີ, ສູນກາງໂທລະພາບໄອພີ, ລະບົບສືບຂ່າວ (ລວມທັງ ລະບົບປ້ອງກັນ), ລະບົບປະຊຸມທາງໄກ, ລະບົບສູນຂໍ້ມູນ, ລະບົບສູນກາ ງກ້ອງວົງຈອນປິດ, ລະບົບສູນກາງ ຄອມພິວເຕີ ແລະ ອື່ນໆ.

ໃນໂອກາດດຽວກັນ, ທ່ານຮອງນາຍົກລັດຖະມົນຕີ ໄດ້ມີຄຳເຫັນເຈາະຈິ້ມ ໃນການນຳໃຊ້ລະບົບຕ່າງໆ ໂດຍສະເພາະແມ່ນ ລະບົບທີ່ຕິດພັນ ກັບການຮັບໃຊ້ບໍລິຫານລັດ, ການຮັບໃຊ້ສັງຄົມ, ຄວາມຄືບໜ້າ ກໍ່ຄື ຄວາມສາມາດ ໃນການນຳໃຊ້ ຂອງລະບົບຕ່າງໆ, ຂໍ້ສະດວກ, ຂໍ້ຈຳກັດ ແລະ ທິດທາງແຜນ ການພັດທະນາ ໃນຕໍ່ໜ້າ. ພ້ອມກັນນັ້ນ, ທ່ານຍັງໄດ້ໄປເບິ່ງພື້ນຖານໂຄງລ່າງ, ການຈັດຕັ້ງປະຕິບັດວຽກງານຕົວຈິງ ຂອງພະນັກງານ-ວິຊາການ ລວມທັງ ເຄື່ອງໃຊ້ ແລະ ອຸປະກອນຕ່າງໆ ທີ່ມີຢູ່ໃນຕຶກສຳນັກງານ ໂຄງການສື່ສານ ຮັບໃຊ້ການນຳ.

ອັນສຳຄັນ, ທ່ານຮອງນາຍົກລັດຖະມົນຕີ ໄດ້ຊີ້ນຳໃຫ້ຄະນະຮັບຜິດຊອບໂຄງການດັ່ງກ່າວ ສ້າງແຜນການຂະຫຍາຍ ສາຍໄຍແກ້ວ ໄປສູ່ເມືອງສະໜາມໄຊ ແຂວງອັດຕະປື ໃຫ້ໄວ ໄປຄຽງຄູ່ກັບ ແຜນການຂະຫຍາຍ ໄປສູ່ເມືອງຕ່າງໆ ໃນຂອບເຂດທົ່ວປະເທດ ໂດຍຈັດລຽງເປັນ ບູລິມະສິດ ແລະ ແທດເໝາະກັບເງື່ອນໄຂຕົວຈິງ ຄັກແນ່, ແລ້ວສະເໜີຂັ້ນເທິງ ພິຈາລະນາຮັບຮອງ ແລະ ຊີ້ນຳໃນຂັ້ນຕໍ່ໄປ. ເຊິ່ງແຜນການອັນຮີບດ່ວນນີ້ ແມ່ນເລັ່ງໃສ່ຮັບໃຊ້ ເຂົ້າໃນການຊ່ວຍເຫຼືອ ແລະ ຟື້ນຟູຊີວິດການເປັນຢູ່ ຂອງປະຊາຊົນ ທີ່ໄດ້ຮັບຜົນກະທົບ ຈາກໄພພິບັດນໍ້າຖ້ວມ ຢູ່ເມືອງສະໜາມໄຊ ໃຫ້ກັບຄືນສູ່ສະພາບ ປົກກະຕິໂດຍໄວ ໂດຍສະເພາະແມ່ນ ວຽກງານການສື່ສານ, ການປະສານງານ, ການໂຄສະນາເຜີຍແຜ່, ການປະຊຸມທາງໄກ ແລະ ອື່ນໆ ໃຫ້ມີຄວາມສະດວກ, ວ່ອງໄວ, ທັນການ ແລະ ມີປະສິດທິຜົນ ພ້ອມທັງ ສາມາດສະກັດກັ້ນໄດ້ ບັນດາປະກົດການ ຫຍໍ້ທໍ້ຕ່າງໆ ແລະ ກາຍເປັນພື້ນຖານ ໃຫ້ແກ່ການປົກປັກຮັກສາ ແລະ ສ້າງສາພັດທະນາປະເທດ ໃນປະຈຸບັນ ກໍ່ຄື ສະເພາະໜ້າ ແລະ ຍາວນານ ອີກດ້ວຍ.

ນອກຈາກນັ້ນ, ທ່ານຮອງນາຍົກລັດຖະມົນຕີ ຍັງໄດ້ຊີ້ນຳໃຫ້ຄົ້ນຄວ້າ ຫາຊ່ອງທາງ ໃນການບໍລິການຮັບໃຊ້ສັງຄົມ ໃຫ້ກວ້າງຂວາງກວ່າເກົ່າ ເພື່ອເຮັດໃຫ້ການນຳໃຊ້ທ່າແຮງທີ່ມີ ໃຫ້ເກີດປະໂຫຍດສູງສຸດ ຕໍ່ການຈັດຕັ້ງຂອງຕົນ ກໍ່ຄື ປະເທດຊາດ ແລະ ປະຊາຊົນ ໃນນັ້ນ ແມ່ນໃຫ້ເອົາໃຈໃສ່ ການເຄື່ອນໄຫວຖືກຕ້ອງ ຕາມລະບຽບກົດໝາຍ ແລະ ສົນທິສັນຍາສາກົນຕ່າງໆ, ຮັບປະກັນຄວາມປອດໄພ ກໍ່ຄື ຄວາມໝັ້ນຄົງຂອງຊາດ ເປັນສິ່ງສຳຄັນ.​

ແຫລ່ງ: ກົມ​ປະ​ຊາ​ສຳ​ພັນ, ພະ​ແນກ​ໂຄ​ສະ​ນາ

LEAVE A REPLY

Please enter your comment!
Please enter your name here