ກະຊວງການເງິນ ສະຫຼຸບຜົນການສຳຫຼວດຫົວໜ່ວຍທຸລະກິດຢູ່ 4 ເມືອງ ນວ ແລະ ຄວາມຄືບໜ້າການນຳໃຊ້ເຄື່ອງບັນທຶກການຂາຍສິນຄ້າ ແລະ ການບໍລິການ

0
2344

ກົມສ່ວຍສາອາກອນ ໄດ້ຈັດກອງປະຊຸມສະຫຼຸບຜົນສຳເລັດການເດີນສຳຫຼວດຫົວໜ່ວຍທຸລະກິດຢູ່ 4 ເມືອງໃນນະຄອນຫຼວງວຽງຈັນ ແລະ ລາຍງານຜົນການນຳໃຊ້ເຄື່ອງບັນທຶກການຂາຍສິນຄ້າ ແລະ ການບໍລິການ (POS) ແລະ ການນໍາໃຊ້ລະບົບ TMIS-EASY TAX ຢູ່ 5 ເມືອງໃນນະຄອນຫຼວງວຽງຈັນ ເມື່ອທ້າຍອາທິດຜ່ານມາ ທີ່ຫ້ອງປະຊຸມກະຊວງການເງິນ, ໂດຍການເປັນປະທານຂອງທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະມົນຕີກະຊວງການເງິນ, ມີທ່ານ ຮອງລັດຖະມົນຕີ ກະຊວງແຜນການ ແລະ ການລົງທຶນ, ມີຫົວໜ້າກົມສ່ວຍສາອາກອນ, ຮອງຫົວໜ້າສູນສະຖິຕິແຫ່ງຊາດ, ຫົວໜ້າພະແນກ-ຮອງພະແນກ, ມີຕາງໜ້າຈາກບັນດາກົມອ້ອມຂ້າງກະຊວງການເງິນ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ໂອກາດນີ້, ທ່ານ ນາງ ເພັດສະໝອນ ສອນ ຮອງຫົວໜ້າສູນສະຖິຕິແຫ່ງຊາດ ໄດ້ລາຍງານໂດຍສັງເຂບກ່ຽວກັບຜົນສຳເລັດການເດີນສຳຫຼວດບັນດາຫົວໜ່ວຍທຸລະກິດຢູ່ 4 ເມືອງໃນນະຄອນຫຼວງວຽງຈັນ (ເມືອງຈັນທະບູລີ, ເມືອງສີສັດຕະນາກ, ໄຊເຊດຖາ ແລະ ເມືອງສີໂຄດຕະບອງ) ວ່າ: ໂຄງການສຳຫຼວດເກັບກຳຂໍ້ມູນຫົວໜ່ວຍທຸລະກິດແມ່ນເພື່ອຮັບໃຊ້ໃຫ້ແກ່ການວາງແຜນນະໂຍບາຍເກັບລາຍຮັບເຂົ້າງົບປະມານໄດ້ຖືກຕ້ອງຊັດເຈນ, ສອດຄ່ອງກັບຕົວຈິງໃນໄລຍະໃໝ່, ຊຶ່ງສອດຄ່ອງກັບຄຳສັ່ງຂອງນາຍົກລັດຖະມົນຕີ ກ່ຽວກັບການລົງສຳຫຼວດເກັບກຳຖານລາຍຮັບຄືນ ໃໝ່ ເພື່ອເຮັດໃຫ້ວຽກງານການສຳຫຼວດໄດ້ດຳເນີນໄປຖືກຕ້ອງຕາມລະບຽບຫຼັກການທີ່ໄດ້ກຳນົດໃນກົດໝາຍວ່າດ້ວຍສະຖິຕິ (ສະບັບປັບປຸງ) ແລະ ໄດ້ຮັບຜົນຕາມຈຸດປະສົງຄາດໝາຍທີ່ກະຊວງການເງິນໄດ້ກຳນົດໄວ້, ຈຶ່ງໄດ້ສົມທົບກັບສູນສະຖິຕິແຫ່ງຊາດ ກະຊວງແຜນການ ແລະ ການລົງທຶນ ແລະ ພາກສ່ວນກ່ຽວຂ້ອງອື່ນໆ…ພ້ອມກັນຄົ້ນຄວ້າສ້າງແຜນໂຄງການສຳຫຼວດນີ້ຂຶ້ນມາ.

ສຳລັບເປົ້າໝາຍການສຳຫຼວດຄັ້ງນີ້, ແມ່ນຫົວໜ່ວຍພື້ນຖານເສດຖະກິດຫົວໜ່ວຍທຸລະກິດ, ຫ້າງຮ້ານຂະ ໜາດນ້ອຍ ແລະ ກາງທີ່ຄຸ້ມຄອງໃນລະບົບແຂວງ ແລະ ເມືອງທີ່ພວມດຳເນີນການເຄື່ອນໄຫວທຸລະກິດການຜະລິດສິນຄ້າ ແລະ ບໍລິການຢູ່ໃນ 4 ເມືອງໃນນະຄອນຫຼວງວຽງຈັນປະກອບມີທັງໝົດ 175 ກວ່າບ້ານ ໃນນີ້, ມີຫົວໜ່ວຍທຸລະກິດທັງໝົດ 23.632 ຫົວໜ່ວຍ, ສ່ວນເມືອງທີ່ມີຈຳນວນຫົວໜ່ວຍທຸລະກິດທີ່ຫຼາຍກວ່າໝູ່ແມ່ນເມືອງໄຊເຊດຖາກວມເອົາ 6.538 ຫົວໜ່ວຍ, ຮອງລົງມາແມ່ນເມືອງສີໂຄດຕະບອງ 6.450 ຫົວໜ່ວຍ, ເມືອງຈັນທະບູລີ, ເມືອງສີສັດຕະນາກຕາມລໍາດັບ.

ນອກນັ້ນ, ການສຳຫຼວດຍັງໄດ້ແນໃສ່ການສຳຫຼວດຂັ້ນບ້ານ ແລະ ບາງຄອບຄົວທີ່ມີການເຊົ່າອາຄານເຮືອນ ແລະ ຫ້ອງແຖວ ເພື່ອເບິ່ງການເກັບລາຍຮັບດ້ານການເຊົ່າຊັບສິນ ທັງນີ້, ກໍ່ເພື່ອເຮັດໃຫ້ການຈັດເກັບລາຍຮັບເຂົ້າງົບປະມານໄດ້ຕາມແຜນການ ແລະ ເພີ່ມຂຶ້ນໃນແຕ່ລະປີ.

ທ່ານ ນາງ ເພັດສະໝອນ ສອນ ຮອງຫົວໜ້າສູນສະຖິຕິແຫ່ງຊາດ ລາຍງານຕື່ມວ່າ: ການສໍາຫຼວດໃນຄັ້ງນີ້, ເປັນຄັ້ງທໍາອິດທີ່ໄດ້ເລີ່ມຈັດຕັ້ງປະຕິບັດແຕ່ວັນທີ 5 ກຸມພາ 2018 ແລະ ແບ່ງເປັນ 2 ແບບຜົນສໍາຫຼວດຄື: ຜົນການສໍາຫຼວດບ້ານຫົວໜ່ວຍທຸລະກິດຢູ່ 4 ເມືອງໃນນະຄອນຫຼວງວຽງຈັນ (F1), ຜົນສໍາຫຼວດຫົວໜ່ວຍທຸລະກິດຢູ່ 4 ເມືອງໃນນະຄອນຫຼວງວຽງຈັນ (F2), ຊຶ່ງສາມາດສະຫຼຸບໄດ້ດັ່ງນີ້: F1 ມີຈໍານວນບ້ານທີ່ມອບພັນທະ 175 ບ້ານ ແລະ ຈໍານວນທີ່ສໍາຫຼວດໄດ້ແມ່ນ 151 ບ້ານທີ່ສາມາດມອບພັນທະການເສຍອາກອນໃນປີ 2017 ໄດ້ທັງໝົດ 8,76 ຕື້ກີບ, F2 ສະຖານທີ່ຕັ້ງຂອງຫົວໜ່ວຍທຸລະກິດທີ່ໄດ້ຈາກການສໍາຫຼວດ 23.632 ຫົວໜ່ວຍ.

ໃນກອງປະຊຸມດັ່ງກ່າວຍັງໄດ້ຮັບຟັງການລາຍງານຈາກທ່ານ ປອ ພູທະນູເພັດ ໄຊສົມບັດ ຫົວໜ້າກົມສ່ວຍສາອາກອນ ກະຊວງການເງິນ ກ່ຽວກັບຄວາມຄືບໜ້າການນຳໃຊ້ເຄື່ອງບັນທຶກການຂາຍສິນຄ້າ ແລະ ການບໍລິການ (POS) ແລະ ການນໍາໃຊ້ລະບົບ TMIS-EASY TAX ຢູ່ 5 ເມືອງໃນນະຄອນຫຼວງວຽງຈັນຄື: (ເມືອງຈັນທະບູລີ, ເມືອງສີສັດຕະນາກ, ເມືອງໄຊເຊດຖາ, ເມືອງສີໂຄດຕະບອງ ແລະ ເມືອງໄຊທານີ) ຊຶ່ງມາຮອດປັດຈຸບັນການຕິດຕັ້ງເຄື່ອງບັນທຶກການຂາຍ ແລະ ບໍລິການ ເຄື່ອງເຊື່ອມຕໍ່ສົ່ງຂໍ້ມູນ P S, ເຄື່ອງຄິດໄລ່ເງິນສົດ CRM ໄດ້ສຳເລັດຄາດໝາຍ 100%, ບັນດາຫົວໜ່ວຍທຸລະກິດທີ່ໄດ້ຮັບການຕິດຕັ້ງ ແລະ ເຊື່ອມຕໍ່ສໍາເລັດແລ້ວມີການເຄື່ອນໄຫວຊື້-ຂາຍຜ່ານ POS ຢ່າງເປັນປົກກະຕິ ແລະ ຮັບປະກັນໃຫ້ມີການນຳໃຊ້ກວມຫຼາຍກວ່າ 80% ຂອງການຕິດຕັ້ງທັງໝົດໃນປີ 2018.

ສຳລັບຫົວໜ່ວຍທຸລະກິດທີ່ບໍ່ໄດ້ນຳໃຊ້ POS ທີ່ນອນໃນລະບອບອາກອບມອບເໝົາຕ້ອງຍົກຖານລາຍຮັບຂຶ້ນໃຫ້ທຽບເທົ່າກັບຫົວໜ່ວຍທຸລະກິດທີ່ໄດ້ຕິດຕັ້ງ ແລະ ນຳໃຊ້ POS ຢູ່ໃນຂອບເຂດທີ່ຕົນຮັບຜິດຊອບກວມຫຼາຍກວ່າ 80%, ສຳລັບຫົວໜ່ວຍທີ່ນຳໃຊ້ເຄື່ອງເຂົາເຈົ້າເອງ ຕ້ອງໄດ້ໃຫ້ມາຂຶ້ນທະບຽນຂໍອະນຸຍາດນຳໃຊ້ເຄື່ອງ ນຳຂະແໜງສ່ວຍສາອາ ກອນ ພ້ອມທັງປັບປຸງຮູບແບບໃບເກັບເງິນໃຫ້ຖືກຕ້ອງຕາມຂະແໜງສ່ວຍສາອາກອນກໍານົດໄວ້.

ພ້ອມດຽວກັນນີ້, ບັນດາຜູ້ເຂົ້າຮ່ວມກອງປະຊຸມຍັງໄດ້ປຶກສາຫາລື, ການປະກອບຄໍາຄິດເຫັນ, ການນໍາໃຊ້ເຄື່ອງບັນທຶກການຂາຍ ສິນຄ້າ ແລະ ການບໍລິການ (POS) ແລະ ການນຳໃຊ້ລະບົບ TMIS-Easy ຢູ່ 5 ເມືອງ. ທັງນີ້, ເພື່ອຮັບປະກັນການຕິດຕັ້ງ, ການຫັນເປັນທັນສະໄໝໃນການຄຸ້ມຄອງເກັບລາຍຮັບຂອງບັນດາຫົວໜ່ວຍທຸລະກິດໃຫ້ສອດ ຄ່ອງກັບກົດໝາຍ ແລະ ນິຕິກໍາລຸ່ມກົດໝາຍທີ່ກ່ຽວຂ້ອງໃຫ້ສໍາເລັດຢ່າງມີປະສິດທິຜົນສູງ.

ພາບ-ຂ່າວ: ກະຊວງການເງິນ

LEAVE A REPLY

Please enter your comment!
Please enter your name here