ປະຊາຊົນທີ່ໄດ້ຮັບຜົນກະທົບທາງທຳມະຊາດ ຢູ່ແຂວງວຽງຈັນ ໄດ້ຮັບການຊ່ວຍເຫຼືອ

0
1073
loading...

ໃນວັນທີ 11 ມິຖຸນາ 2018 ຜ່ານມາ ອຳນາດການປົກຄອງແຂວງວຽງຈັນ ໄດ້ມອບສັງກະສີຈຳນວນ 2.700 ແຜ່ນ,ລວມມູນຄ່າ 94.500.000 ກີບ ໃຫ້ປະຊາຊົນທີ່ໄດ້ຮັບຜົນກະທົບຈາກໄພພິບັດທາງທຳມະຊາດ ພາຍຸລະດູຮ້ອນ, ຝົນຕົກໜັກ, ໝາກເຫັບຕົກ ຢູ່ທີ່ບ້ານນາບໍ່ ແລະ ບ້ານນາເພີຍ ເມືອງທຸລະຄົມ ໃນຕອນແລງຂອງວັນທີ 16 ເມສາ 2018 ທີ່ຜ່ານມາ ເປັນສາຍເຫດທີ່ເຮັດໃຫ້ເຮືອນຊານຂອງປະຊາຊົນຖືກເປ່ເພເສຍຫາຍ 141 ຄອບຄົວ, ລວມມູນຄ່າເສຍຫາຍ 277 ລ້ານກວ່າກີບ,ເຊິ່ງມີສັງກະສີ, ກະເບື້ອງ ແລະ ສັດປີກຕາຍ, ຄອບຄົວທີ່ຖືກຜົນກະທົບ ແລະ ເສຍຫາຍ 60% ຂຶ້ນໄປມີ 50 ຄອບຄົວ.

ເປັນກຽດກ່າວມອບສັງກະສີຈຳນວນດັ່ງກ່າວ ໂດຍແມ່ນ ທ່ານ ບຸນສອນ ເພັດລາວັນ ຮອງເຈົ້າແຂວງວໆວຽງຈັນ ເຊິ່ງທ່ານໄດ້ກ່າວວ່າ: ສັງກະສີຈຳນວນດັ່ງກ່າວນີ້ ແມ່ນມອບໃຫ້ເຈົ້າເມືອງໆທຸລະຄົມ ນຳໄປມອບຕໍ່ໃຫ້ປະຊາຊົນທີ່ໄດ້ຮັບຜົນກະທົບຕົວຈິງໃຫ້ທົ່ວເຖິງ ເພຶ່ອໃຫ້ເຂົາເຈົ້າໄດ້ນຳໄປສ້ອມ ແປງ,ຟື້ນຟູເຮືອນຊານຂອງໃຜລາວ ໃຫ້ຄືນສູ່ສະພາບປົກກະຕິ.

ທ່ານ ເສດໄຊ ວິໄລໄຟ ເຈົ້າເມືອງໆທຸລະຄົມ ໄດ້ຕາງໜ້າໃຫ້ປະຊາຊົນທີ່ໄດ້ຮັບຜົນກະທົບຄັ້ງນີ້ກ່າວຮັບສັງກະສີຈຳນວນດັ່ງກ່າວ ແລະ ກ່າວສະແດງຄວາມຮູ້ບຸນຄຸນ ຕໍ່ອຳນາດການປົກຄອງແຂວງກໍ່ຄືພັກ-ລັດ ທີ່ມີຄວາມເປັນຫ່ວງເປັນໃຍຕໍ່ປະຊາຊົນບັນດາເຜົ່າ ແລະ ຈະນຳເອົາສັງກະສີຈຳນວນ 2.700 ແຜ່ນນີ້ ໄປມອບຕໍ່ໃຫ້ປະຊາຊົນຕາມເປົ້າໝາຍໃຫ້ທົ່ວເຖິງ.

LEAVE A REPLY

Please enter your comment!
Please enter your name here