ນະຄອນຫຼວງ ເລັ່ງຫາລືເພື່ອສ້າງຄວາມເປັນເອກະພາບອາຫານຈານດ່ຽວ ແລະ ນ້ຳມັນເຊື້ອໄຟ

0
3116

ພະ​ແນກ​ອຸດສາຫະກຳ ແລະ ການ​ຄ້າ ນະຄອນຫຼວງ​ວຽງ​ຈັນ (ນວ) ຈັດ​ກອງ​ປະຊຸມ​ປຶກສາ​ຫາລື​ຂອງ​ຄະນະ​ຊີ້​ນຳ​ວຽກ​ງານ​ຄຸ້ມ​ຄອງ​ສິນຄ້າ ແລະ ຄ່າ​ບໍລິການ ເພື່ອ​ລົງ​ເລິກ​ກ່ຽວ​ກັບ​ການຈັດຕັ້ງ​ປະຕິບັດ ​ຂໍ້​ຕົກລົງ​ວ່າ​ດ້ວຍ​ການ​ແຕ່ງຕັ້ງ​ຄະນະ​ຊີ້​ນຳ​ວຽກ​ງານ​ຄຸ້ມ​ຄອງ​ສິນຄ້າ ແລະ ຄ່າ​ບໍລິການ​ອາຫານ​ຈານ​ດ່ຽວ ປະເພດ​ເຝີ​ເຂົ້າປຽກ ເຂົ້າຜັດ ແລະ ເຂົ້າລາດໜ້າ ດຳລັດ​ສະບັບ​ເລກ​ທີ 331/ນວ ວ່າ​ດ້ວຍ​ທຸລະ​ກິດ​ນ້ຳມັນ​ເຊື້ອ​ໄຟ ແລະ ຄຳ​ແນະນຳ​ສະບັບ​ເລກ​ທີ 0521/​ອຄ.​ກຄພນ ກ່ຽວ​ກັບ​ການຈັດຕັ້ງ​ປະຕິບັດ​ເນື້ອ​ໃນ​ບາງ​ມາດຕາ​ຂອງ​ດຳລັດ​ວ່າ​ດ້ວຍ​ທຸລະ​ກິດ​ນ້ຳມັນ​ເຊື້ອ​ໄຟ ສະບັບ​ເລກ​ທີ 331/​ນຍ ແລະ ເອກະສານ​ສຳຄັນ​ອື່ນໆ.

ກອງ​ປະຊຸມ​ດັ່ງກ່າວ ຈັດ​ຂຶ້ນ​ວັນ​ທີ 7 ມິຖຸນາ 2018 ຢູ່​ພະ​ແນກ​ອຸດສາຫະກຳ ແລະ ການ​ຄ້າ ນວ ມີ​ທ່ານ ແກ້ວ​ພິລາ​ວັນ ອາ​ໄພ​ລາດ ຮອງ​ເຈົ້າ​ຄອງ ນວ ປະທານ​ຄະນະ​ຊີ້​ນຳ​ວຽກ​ງານ​ຄຸ້ມ​ຄອງ​ສິນຄ້າ ແລະ ຄ່າ​ບໍລິການ​ຂັ້ນ ນວ ທ່ານ ເບີ​ລິນ ເພັດ​ຈັນທະ​ຣາດ ຫົວໜ້າ​ພະ​ແນກ​ອຸດສາຫະກຳ ແລະ ການ​ຄ້າ ຮອງ​ປະທານ​ຜູ້​ປະຈຳການ​ຄະນະ​ຊີ້​ນຳ​ວຽກ​ງານ​ຄຸ້ມ​ຄອງ​ສິນຄ້າ ແລະ ຄ່າ​ບໍລິການ​ຂັ້ນ ນວ ພ້ອມ​ດ້ວຍ​ຄະນະ​ຊີ້​ນຳ ແລະ ພາກສ່ວນ​ກ່ຽວຂ້ອງ​ເຂົ້າ​ຮ່ວມ.

ກອງ​ປະຊຸມ​ຄັ້ງ​ນີ້ ແນໃສ່​ສ້າງ​ຄວາມ​ເປັນ​ເອກະ​ພາບ​ໃນ​ການ​ເຮັດ​ໃຫ້​ລາຄາ​ອາຫານ​ຈານ​ດ່ຽວ ປະເພດ​ເຝີ ເຂົ້າປຽກ ເຂົ້າຜັດ ແລະ ເຂົ້າລາດໜ້າ ມີ​ລາຄາ​ສົມ​ເຫດ​ສົມ​ຜົນ ຜູ້​ດຳເນີນ​ທຸລະ​ກິດ​ສາມາດ​ມີ​ກຳໄລ ແລະ ຜູ້​ຊົມໃຊ້​ສາມາດ​ບໍລິໂພກ​ອາຫານ​ທີ່​ມີ​ຄຸນະພາບ​ໃນ​ລາຄາ​ເໝາະ​ສົມ ທັງ​ສາມາດ​ຮັກສາ​ໄດ້​ສະຖຽນ​ລະ​ພາບ​ດ້ານ​ລາຄາ ຊ່ວຍ​ຫຼຸດຜ່ອນ​ພາລະ​ຄ່າ​ຄອງ​ຊີບ​ຂອງ​ຜູ້​ຊົມໃຊ້​ໃຫ້​ໄດ້​ຮັບ​ການ​ແກ້​ໄຂ​ດີ​ຂຶ້ນ​ເທື່ອ​ລະ​ກ້າວ ທັງ​ເປັນ​ການ​ຮອງ​ຮັບ​ປີ​ທ່ອງ​ທ່ຽວ​ລາວ 2018 ເພື່ອ​ເຮັດ​ໃຫ້ການ​ດຳເນີນ​ທຸລະ​ກິດ​ນ້ຳມັນ​ເຊື້ອ​ໄຟ​ຖືກຕ້ອງ ແລະ ສອດຄ່ອງ​ກັບ​ກົດໝາຍ ແນໃສ່​ປົກ​ປ້ອງ​ສິດ ແລະ ຜົນ​ປະໂຫຍດ​ຂອງ​ລັດ ຜູ້​ດຳເນີນ​ທຸລະ​ກິດ ແລະ ຜູ້​ຊົມໃຊ້ ປະກອບສ່ວນ​ໃນ​ການ​ພັດທະນາ​ເສດຖະກິດ-ສັງຄົມ​ຂອງ​ຊາດ ນອກ​ນີ້ຍັງ​ເປັນ​ການ​ສ້າງ​ຄວາມ​ເຂົ້າໃຈ​ຢ່າງ​ຈະແຈ້ງ ແລະ ມີ​ຄວາມ​ເປັນ​ເອກະ​ພາບ​ໃນ​ຂອບ​ເຂດ​ທົ່ວ​ປະເທດ ແນໃສ່​ປັບປຸງ​ທຸລະ​ກິດ​ນ້ຳມັນ​ເຊື້ອ​ໄຟ​ທີ່​ມີ​ໃນ​ປັດຈຸບັນ ​ໃຫ້​ເຄື່ອນ​ໄຫວ​ທຸລະ​ກິດ​ຖືກຕ້ອງ​ຕາມ​ເງື່ອນໄຂ​ທີ່​ກຳນົດ​ໄວ້ ທັງ​ນີ້ກໍ່​ເພື່ອ​ໃຫ້​ຄະນະ​ຊີ້​ນຳ​ວຽກ​ງານ​ຄຸ້ມ​ຄອງ​ສິນຄ້າ ແລະ ຄ່າ​ບໍລິການ​ຂັ້ນ ນວ ນຳໄປ​ຜັນ​ຂະຫຍາຍ​ຕໍ່ໃຫ້​ກວ້າງຂວາງ ແລະ ມີ​ປະ​ສິດທິ​ຜົນ.

ຫ້ອງການກະຊວງ ອຸດສາຫະກຳ ແລະການຄ້າ ຈິ່ງໄດ້ອອກແຈ້ງການ ໃຫ້ພະແນກອຸດສາຫະກຳ ແລະການຄ້າ ນະຄອນຫຼວງສົມທົບກັບພະແນກຖະແຫຼງຂ່າວ ວັດທະນະທຳ ແລະທ່ອງທ່ຽວ ຮ່ວມກັບຂະແໜງການອື່ນທີ່ກ່ຽວຂ້ອງ ພ້ອມກັນຈັດຕັ້ງປະຕິບັດລາຄາຊີ້ນຳ/ການຂາຍປະເພດອາຫານຈານດ່ຽວປະເພດ: ເຝີ, ເຂົ້າປຽກ, ເຂົ້າຜັດ ແລະເຂົ້າລາດໜ້າ ສູງສຸດບໍ່ໃຫ້ເກີນ 15,000 ກີບ/ຖ້ວຍ/ຈານ (ໃນກໍລະນີທີ່ຜູ້ຊົມໃຊ້ມີຄວາມຕ້ອງການອາຫານໃນປະລິມານພິເສດ ກໍໃຫ້ຕົກລົງລາຄາ ແລະເອກະພາບກັບຜູ້ດຳເນີນທຸລະກິດເອງ).

ລາຄາຊີ້ນຳອາຫານຈານດ່ຽວແມ່ນໃຫ້ປະຕິບັດຢູ່ຕາມສະຖານທີ່ດັ່ງລຸ່ມນີ້: ຮ້ານອາຫານທົ່ວໄປ, ຫ້ອງອາຫານຢູ່ຕາມສຳນັກງານຫ້ອງການ,ສູນອາຫານໃນຫ້າງຊັບພະສິນຄ້າ, ຮ້ານອາຫານທີ່ຢູ່ຕາມໂຮງງານ, ໂຮງໝໍ, ໂຮງຮຽນ, ສະຖາບັນການສຶກສາທີ່ກ່ຽວຂ້ອງພາຍໃນຫ້ອງການ.

ການກຳນົດລາຄາອາຫານດັ່ງກ່າວນີ້ໃຫ້ປະຕິບັດນັບແຕ່ວັນມີ 25 ພຶດສະພາ 2018 ເປັນຕົ້ນໄປ ຖ້າຫາກພົບເຫັນທຸລະກິດ ຫຼື ຮ້ານໃດຂາຍເກີນລາຄາຊີ້ນຳ ແມ່ນໃຫ້ປະຕິບັດຕາມທີ່ກຳນົດໄວ້ໃນດຳລັດ 474/ນຍ, ກົດໝາຍກ່ຽວຂ້ອງ.

LEAVE A REPLY

Please enter your comment!
Please enter your name here