ດີໃຈນ້ອງໆມີອະນາຄົດໃໝ່ແລ້ວ

0
37484

 

ມື້ນີ້ມີຂ່າວອັບເດດໃໝ່ ສຳລັບນ້ອງທີ່ຂາດພໍ່ແມ່ເບິ່ງແຍງທີ່ ບ້ານກໍໄຮເມືອງກວັນ ແຂວງຫົວພັນ ຕອນນີ້ແມ່ນນ້ອງມີທີ່ຢູ່ໃໝ່ແລ້ວ ແລະເຊື່ອວ່ານ້ອງທີ່ທົນຢູ່ກັບຄວາມທຸກຍາກລຳບາກມາຫຼາຍປີ ຈະມີອະນາຄົດທີ່ດີ ມີວິຊາຊີບແລະເຕີບໂຕເປັນຜູ້ໃຫຍ່ທີ່ດີ ພາຍຫຼັງທີ່ໂຮງຮຽນເດັກກຳພ້າຮັບເປັນກໍລະນີພິເສດໃຫ້ພວກນ້ອງໄດ້ເຂົ້າສຶກສາຮ່ຳຮຽນແລ້ວ.

ຕາມຂ່າວຫຼ້າສຸດຈາກ OneHeart.la ໃຫ້ຮູ້ວ່າ: ຕອນນີ້ ນ້ອງ ລີ ແລະ ອ້າຍເອື້ອຍໄດ້ຖືກຮັບມາຢູ່ໂຮງຮຽນລ້ຽງເດັກກຳພ້າແຂວງຫົວພັນເປັນທີ່ຮຽບຮ້ອຍແລ້ວ ຫລັງຈາກສະຫະພັນແມ່ຍິງແຂວງຫົວພັນ ໄດ້ໄປພົບເຫັນສະພາບຄວາມເປັນຈິງຂອງເດັກທັງ 3 ເຫັນວ່າມີຄວາມທຸກຍາກຂາດເຂີນຫລາຍ ບໍ່ສາມາດອາໄສຢູ່ໄດ້ຕາມລຳພັງ ຈຶ່ງໄດ້ຍົກເປັນກໍລະນີພິເສດ ໃຫ້ທັງ 3 ເຂົ້າມາອາໄສ ແລະ ຮໍ່າຮຽນຢູ່ໃນໂຮງຮຽນລ້ຽງເດັກກຳພ້າ (SOS) ແຂວງ ຫົວພັນ ນັບແຕ່ວັນທີ 07/06/2018 ຈົນກວ່າຈະເຕີບໃຫຍ່.

ສຳລັບເງິນຊ່ວຍເຫລືອທີ່ໄດ້ຮັບຈາກຜູ້ໃຈບຸນຜ່ານ BCEL OneHeart ທັງ 81 ທ່ານ ນັ້ນ ທາງໂຮງຮຽນຈະເອົາເຂົ້າບັນຊີຂອງເດັກໄວ້ປະກອບເປັນທຶນການສຶກສາເວລາທີ່ພວກເຂົາເຕີບໃຫຍ່ໄປຮຽນວິຊາຊີບໃນອະນາຄົດ.

BCEL One Heart ເປັນຜະລິດຕະພັນ ທີ່ ທຄຕລ ມີຄວາມຕັ້ງໃຈນໍາໃຊ້ເທັກໂນໂລຢີທີ່ທັນສະໄໝເຂົ້າໃນວຽກ ງານຊ່ວຍເຫຼືອສັງຄົມໂດຍບໍ່ຫວັງຜົນກຳໄລ ແລະ ບໍ່ມີຄ່າທຳນຽມ ການບໍລິຈາກກໍ່ງ່າຍ, ເຊິ່ງຈະຊ່ວຍໃຫ້ຜູ້ຫຍຸ້ງຍາກໄດ້ຮັບການຊ່ວຍເຫຼືອຕາມຄວາມເໝາະສົມ, ຜູ້ທີ່ບໍລິຈາກກໍ່ມີຄວາມໝັ້ນໃຈໄດ້ວ່າການບໍລິຈາກຂອງຕົນຈະເຖິງມືຜູ້ຕ້ອງການຄວາມຊ່ວຍເຫຼືອແທ້.

ຕອນນີ້ນ້ອງໆຜູ້ທີ່ຂາດທີ່ເພິ່ງພາອາໄສ ແມ່ນໄດ້ມາຢູ່ໃນອ້ອມອົກຂອງໂຮງຮຽນເດັກກຳພ້າແຂວງຫົວພັນແລ້ວ, ນ້ອງໄດ້ມີໝູ່ໃໝ່ ມີຄອບຄົວທີ່ຢູ່ນຳກັນຫຼາຍໆຄົນ, ຊຶ່ງບໍ່ແມ່ນຈະມີອະນາຄົດທີ່ດີເທົ່ານັ້ນ ແຕ່ນ້ອງໆທັງໝົດຈະໄດ້ຮຽນຮູ້ການຢູ່ຮ່ວມກັນກັບສັງຄົມ,  ໄດ້ຮັບການສຶກສາຮ່ຳຮຽນທີ່ດີ ແລະຮຽນຮູ້ການໃຊ້ຊີວິດຮ່ວມກັບຄົນອື່ນອີກດ້ວຍ.

 

 

 

 

 

LEAVE A REPLY

Please enter your comment!
Please enter your name here