ສະມາຊິກສະພາ ຫົວພັນ ມອບເຄື່ອງຊ່ວຍເຫຼືອໃຫ້ຄອບຄົວພໍ່ເຖົ້າຈໍາປາ ທີ່ໄດ້ຮັບເຄາະຈາກໄຟໄໝ້

0
779


ຕອນເຊົ້າວັນທີ 18 ພຶດສະພາ 2018 ສະມາຊິກສະພາແຫ່ງຊາດປະຈຳເຂດເລືອກຕັ້ງທີ 8 ແຂວງຫົວພັນ ແລະ ສະມາຊິກສະພາປະຊາຊົນແຂວງ ມອບເຄື່ອງຊ່ວຍເຫຼືອໃຫ້ແກ່ຄອບຄົວ ພໍ່ເຖົ້າຈຳປາ ແລະ ຄອບຄົວຊາວຫວຽດນາມ ບ້ານພັນໄຊ ເມືອງຊໍາເໜຶອ ແຂວງຫົວພັນ ທີ່ຖືກເຄາະຮ້າຍຈາກໄຟໄໝ້ເຮືອນ. ຕາງໜ້າມອບໂດຍ ທ່ານ ຄຳວອນ ບຸນທະວົງ ຮອງເລຂາພັກແຂວງ ປະທານສະພາປະຊາຊົນແຂວງ, ບັນດາທ່ານຄະນະປະຈຳສະພາປະຊາຊົນແຂວງ ແລະ ພາກສ່ວນທີ່ກ່ຽວຂ້ອງເປັນສັກຂີພິຍານ ເຄື່ອງທີ່ນຳໄປຊ່ວຍເຫຼືອຄັ້ງນີ້ ມີເງີນຈຳນວນ 4.000.000 ກີບ, ເຄື່ອງໃຊ້ຄົວເຮືອນ ຈຳນວນ 2 ຊຸດ, ເຄື່ອງນຸ່ງ 2 ແກັດ ແລະ ເກີບອີກຈຳນວນໜື່ງ.


ເຊິ່ງການມອບຄັ້ງນີ້ ລວມມູນຄ່າທັງໝົດ 4.300.000 ກີບ ຈຳນວນເຄື່ອງຊ່ວຍເຫຼືອໃນຄັ້ງນີ້ແມ່ນມາຈາກການລະດົມນຳສະມາຊິກສະພາແຫ່ງຊາດປະຈຳເຂດເລືອກຕັ້ງທີ 8 ແຂວງຫົວພັນ, ສະມາຊິກສະພາປະຊາຊົນແຂວງ ແລະ ພະນັກງານ – ລັດຖະກອນພາຍໃນສະພາປະຊາຊົນແຂວງ ຫົວພັນ.


ຈາກນັ້ນບັນດາທ່ານ ສສຊ ແລະ ສສຂ ຍັງໄດ້ສະແດງຄວາມເສຍໃຈຕໍ່ເຫດການດັ່ງກ່າວທີ່ເກິດຂຶ້ນ ແລະ ຍັງຮຽກຮ້ອງມາຍັງຄອບຄົວພໍ່ເຖົ້າຈຳປາ ແລະ ຄອບຄົວຊາວຫວຽດນາມຈົ່ງສືບຕໍ່ເອົາໃຈໃສ່ຕ້ານທຸກປະກົດການຫຍໍ້ທໍ້ທີ່ເກິດຂຶ້ນໃນສັງຄົມ ແລະ ສ້າງເສດຖະກິດຄອບຄົວໃຫ້ນັບມື້ນັບດີຂຶ້ນ.


ຂໍ້ມູນຈາກ: ສະພາປະຊາຊົນແຂວງຫົວພັນ

LEAVE A REPLY

Please enter your comment!
Please enter your name here