ດີໃຈແທນຊາວນາໜອງບົກ ດຽວນີ້ມີພໍ່ຄ້າຮັບຊື້ເຂົ້າຮອດກາງທົ່ງ

0
281
????????????????????????????????????

ລະດູການຜະລິດເຂົ້ານາແຊງປີນີ້ຊາວນາເມືອງໜອງບົກ ແຂວງຄໍາມ່ວນຍີ້ມເປື້ອຍໆ ທີ່ເຫັນວ່າສະພາບຜົນຜະລິດໄດ້ຮັບໝາກຜົນດີໝາກດົກຮວງໜາ ພໍ່ຄ້າກໍ່ເປັນໃຈໄປບໍລິການຊື້ເຂົ້າຮອດທົ່ງຖືເປັນກຳລັງໃຈຄັ້ງສຳຄັນໃຫ້ຊາວກະສິກອນໄດ້ມີແຮງສູ້ໃນລະດູການຕໍ່ໄປ.

 

ຕາມການລົງຕິດຕາມການເກັບກ່ຽວຜົນຜະລິດກະສິກຳຂອງສື່ມວນຊົນທ້ອງຖິ່ນ ໃນໂອກາດທີ່ສື່ມວນຊົນທ້ອງຖິ່ນໄດ້ລົງເຄື່ອນໄຫວຕິດຕາມຊຸກຍູ້ການເກັບກ່ຽວເຂົ້ານາແຊງຮ່ວມກັບທ່ານ ບຸນຈັນ ໄຊປັນຍາ ຫົວໜ້າພະແນກກະສິກໍາ ແລະ ປ່າໄມ້ແຂວງກໍ່ໄດ້ສໍາພາດທ້າວ ສຸກສາຄອນ ໂຄດຕະວົງ ຕາງໜ້າກຸ່ມຊາວນາບ້ານດົງສະຫງໍາ ,ເມືອງໜອງບົກໃຫ້ຮູ້ວ່າ: ບ້ານດົງສະຫງໍາແມ່ນບ້ານໜຶ່ງໃນຈໍານວນ 55 ບ້ານທີ່ຂຶ້ນກັບເມືອງໜອງບົກ, ປະກອບມີ 108 ຫຼັງຄາເຮືອນ , 92 ຄອບຄົວ , ມີປະຊາຊົນທັງໝົດ 518 ຄົນ , ຍິງ 295 ຄົນ , ອາຊີບຫຼັກຂອງປະຊາຊົນແມ່ນເຮັດນາ 2 ລະດູຄື : ລະດູແລ້ງ ແລະ ລະດູຝົນ , ປູກພືດ – ລ້ຽງສັດ – ຄ້າຂາຍເປັນສໍາຮອງ .

ທົ່ວບ້ານມີເນື້ອທີ່ນາທັງໝົດ 147 ເຮັກຕາ ແຕ່ຖ້າມີການບຸກເບີກຊັບຊ່າວເຕີມຄາດວ່າຈະບັນລຸ 200 ເຮັກຕາ , ສໍາລັບເນື້ອທີ່ນາແຊງທີ່ສາມາດເຮັດໄດ້ໃນປະຈຸບັນເທົ່າກັບ 69 ເຮັກຕາ .

ທ້າວ ສຸກສາຄອນກ່າວວ່າ : ຜົນຜະລິດເຂົ້ານາແຊງຂອງປີນີ້ແມ່ນໄດ້ຮັບຜົນດີກວ່າປີຜ່ານມາສາເຫດແມ່ນເນື່ອງມາຈາກສະພາບດິນຟ້າອາກາດທີ່ເໝາະສົມບວກກັບການໃຊ້ເຕັກນິກເຂົ້າໃສ່ການຜະລິດເປັນຕົ້ນແມ່ນການບຸ່ມຕໍເຟືອງເກົ່າເພື່ອສະສົມຝຸ່ນບໍາລຸງດິນໃຫ້ເຂົ້າງາມຕະຫຼອດປີເຊິ່ງເປັນຫຼຸດຜ່ອນການໃຊ້ສານເຄມີ ແລະ ປະຢັດຕົ້ນທຶນ . ສ່ວນສະມັດຕະພາບຂອງຜົນຜະລິດປີນີ້ແມ່ນບັນລຸ 4 ໂຕນ / ເຮັກຕາ , ການຜະລິດເຂົ້າພາຍໃນບ້ານດົງສະຫງໍາສ່ວນໃຫຍ່ແມ່ນຜະລິດເປັນສິນຄ້າເພື່ອສ້າງເສດຖະກິດໃຫ້ຄອບຄົວສ່ວນເຂົ້ານາປີແມ່ນແຮໄວ້ເປັນສະບຽງອາຫານ .

ປະຈຸບັນກຸ່ມຊາວນາບ້ານດົງສະຫງໍາມີຢູ່ທັງໝົດ 83 ຄອບຄົວ , ສະເລ່ຍລາຍຮັບຕໍ່ຄອບຄົວໄດ້ 17 ລ້ານກີບ / ຄອບຄົວ / ປີ .

ການເຮັດນາແຊງມາຮອດປະຈຸບັນແມ່ນມີຄວາມສະດວກຂຶ້ນເນື່ອງຈາກວ່າມີພໍ່ຄ້າຄົນກາງມາຮັບຊື້ກັບທີ່ ( ທົ່ງນາ ) ໃນລາຄາເຂົ້າເປືອກອັດຕາຄວາມຊືນ 23 – 25 % ຕົກຢູ່ 1 ໝືນເທົ່າກັບ 23.500 ກີບເຊິ່ງລາຄາດັ່ງກ່າວຖືວ່າສົມເຫດສົມລະຫວ່າງຊາວນາ ( ຜູ້ຂາຍ ) ແລະ ພໍ່ຄ້າຄົນກາງ ( ຜູ້ຊື້ ) ພາຍຫຼັງທີ່ຮັບຊື້ຈາກຊາວນາແລ້ວແມ່ນໄປສົ່ງໃຫ້ກຸ່ມໂຮງສີ ຫຼື ໂຮງສີໃຫຍ່ມາດຕະຖານຢູ່ແຂວງສະຫວັນນະເຂດ .

ຂ່າວ-ພາບ: ແດງສະຫວັດ ແສນພານິດ .

LEAVE A REPLY

Please enter your comment!
Please enter your name here