ປະທານສານລົງແຕ່ງຕັ້ງເອງຜູ້ພິພາກສາສານແຂວງເຊກອງ

0
306

ໃນວັນທີ 16 ພືດສະພາ 2018 ຜ່ານມາ ໄດ້ມີພິທີປະກາດການແຕ່ງຕັ້ງຜູ້ພິພາກສາສານປະຊາຊົນເຂດ I ແຂວງເຊກອງ ທີ່ສະໂມສອນປົກຄອງແຂວງໂດຍການເຂົ້າຮ່ວມຂອງທ່ານ ຄຳພັນ ສິດທິດຳພາ ປະທານສານປະຊາຊົນສູງສຸດ, ທ່ານ ພອນເພັດ ຄິວລະວົງ ປະທານສະພາປະຊາຊົນແຂວງເຊກອງ, ມີປະທານ-ຮອງປະທານສານປະຊາຊົນແຂວງ, ຂະແໜງການກ່ຽວຂ້ອງ ແລະພະນັກງານ-ລັດຖະກອນສານປະຊາຊົນແຂວງ-ເຂດເຂົ້າຮ່ວມຢ່າງພ້ອມພຽງ.

ທ່ານ ຄໍາພົນ ແກ້ວປະເສີດ ປະທານສານປະຊາຊົນເຂດໄດ້ຂຶ້ນຜ່ານບົດສະຫຼູບໂດຍຫຍໍ້ສານປະຊາຊົນເຂດ I ແຂວງເຊກອງໃນໄລຍະຜ່ານມາ ໂດຍໃຫ້ຮູ້ວ່າ: ທາງສານເຂດ I ໄດ້ເອົາໃຈໃສ່ການຄົ້ນຄວ້າຄະດີ ແລະ ແກ້ໄຂຄະດີມີຄວາມວ່ອງໄວໂປ່ງໃສຫຼຸດຜ່ອນຫາງສຽງຈົ່ມວ່າຈາກສັງຄົມ, ຜ່ານມາເຫັນວ່າມີຄວາມລະອຽດຮອບຄອບ, ຄະດີທີ່ບໍ່ຈະແຈ້ງ, ຂໍ້ມູນບໍ່ຮັດກຸມ ກໍ່ໄດ້ສົມທົບກັບຄູ່ຄວາມ ອຳນາດການປົກຄອງທີ່ກ່ຽວຂ້ອງເກັບຂໍ້ມູນໃຫ້ຄົບຖ້ວນ ແລະ ຮອບດ້ານໂດຍເລັ່ງໃສ່ການສຶກສາອົບຮົມ, ການໄກ່ເກັ່ຍຄູ່ຄວາມເປັນຕໍ.

ເຊິ່ງຕະຫຼອດໄລຍະ 1 ປີ ຜ່ານມາສາມາດ ແກ້ໄຂຄະດີຂອງສານປະຊາຊົນເຂດ I ແຂວງເຊກອງ ລວມຄະດີທັງໝົດ 21 ເລື່ອງ, ແກ້ໄຂສຳເລັດ 10 ເລື່ອງ, ສົ່ງໄປບ່ອນອື່ນ 6 ເລື່ອງ,ຖອນຟ້ອງ 1 ເລື່ອງ ແລະຍັງຄ້າງ 4 ເລື່ອງ ໂດຍທີ່ເກີດຂຶ້ນຫຼາຍກວ່າໝູ່ແມ່ນຄະດີແພ່ງ 11 ເລື່ອງ, ຮອງມາແມ່ນຄະດີຄອບຄົວ 7 ເລື່ອງ ແລະຄະດີອາຍາ 3 ເລື່ອງ.


ຫຼັງຈາກນັ້ນ ທ່ານ ກັ້ງ ເຕັມສົມບັດ ຫົວໜ້າກົມຈັດຕັ້ງ-ພະນັກງານ, ສານປະຊາຊົນສູງສຸດ ກໍໄດ້ຂຶ້ນຜ່ານມະຕິຂອງຄະນະປະຈຳສະພາແຫ່ງຊາດ ສະບັບເລກທີ 058/ຄປຈ, ລົງວັນທີ 16/03/2018 ວ່າດ້ວຍການແຕ່ງຕັ້ງຜູ່ພິພາກສາສານປະຊາຊົນເຂດ I ແຂວງເຊກອງ ຊຶ່ງໃນນີ້ເຫັນດີແຕ່ງຕັ້ງທ່ານ ເກດດວງຈັນ ພົມມະແສງ ຜູ້ຊ່ວຍຜູ້ພິພາກສາຂຶ້ນເປັນຜູ້ພິພາກສາຂັ້ນໜື່ງ, ຊັ້ນສີ່ປະຈໍາຢູ່ສານປະຊາຊົນເຂດ I ແຂວງເຊກອງ.

ໃນຕອນທ້າຍທ່ານ ຄໍາພັນ ສິດທິດໍາພາ ປະທານສານປະຊາຊົນສູງສຸດ ກໍໄດ້ມີຄຳເຫັນໂອ້ລົມຕໍ່ພະນັກງານຫຼັກແຫຼ່ງຂອງສານປະຊາຊົນແຂວງ ແລະຜູ້ທີ່ໄດ້ຮັບການແຕ່ງຕັ້ງ ໂດຍໄດ້ເນັ້ນໜັກໃຫ້ຜູ້ຖືກແຕ່ງຕັ້ງຄົນໃໝ່ ເອົາໃຈໃສ່ປະຕິບັດໜ້າທີ່ວຽກງານທີ່ໄດ້ຮັບມອບໝາຍໃຫ້ມີຄວາມວ່ອງໄວ, ໂປ່ງໃສ ແລະຍຸຕິທຳ ໂດຍສະເພາະແມ່ນການຄົ້ນຄວ້າ ແລະຕັດສິນຄະດີຕ່າງໆ.

ຂ່າວ: ວິຈັນດາ

LEAVE A REPLY

Please enter your comment!
Please enter your name here