ໝາເກືອບ 10 ໂຕລຸມກັດຍາພໍ່ເຈັບໜັກສົມຄວນ

0
56
loading...

ຍາຄູສະມຸຄະນິດສອນ ປັນຍາວິຊຸໂຣ ໄວ 68 ປີມີບາດແຜເຕັມໂຕ ຍ້ອນຖືກແຂ້ວໝາກັດ ແລະຍັງມີແຜຈີກຂາດເກືອບ 50 ບ່ອນຕ້ອງຫຍິບລວມຫຼາຍກວ່າ 20 ເຂັມ ຕອນນີ້ຍັງນອນຮັກສາຕົວຢູ່ໂຮງໝໍ ພາຍຫຼັງຖືກໝາເກືອບ 10 ໂຕລຸມກັດໃນຂະນະອອກບິນທະບາດ.

ເຫດການເກີດຂຶ້ນໃນຕອນເຊົ້າວັນທີ 15 ພືດສະພາ 2018 ຜ່ານມາ ທີ່ບ້ານບັງຫົວກວດ ອຳເພີເມືອງ ຈັງຫວັດສະມຸດສົງຄາມ ປະເທດໄທ, ຕາມການສອບຖາມຍາຄູບອກວ່າ: ຍາຄູເອງແມ່ນໄດ້ອອກບິນທະບາດຕາມເສັ້ນທາງນີ້ເປັນປະຈຳທຸກວັນ ໃນມື້ເກີດເຫດຍ່າງມາກໍ່ເຫັນໝາໃຫຍ່ລວມກັນ 7 ໂຕຢູ່ຂ້າງທາງ ໂຕເອງໄດ້ພະຍາຍາມຍ່າງອອກໄປຝາກທາງກົງກັນຂ້າມໃຫ້ຫຼາຍທີ່ສຸດ ແຕ່ຢູ່ໆໝາຝຸງດັ່ງກ່າວກໍ່ເຂົ້າມາລຸມກັດກະທັນຫັນຈົນໂຕເອງລົ້ມລົງ ຕອນນັ້ນທຳໃຈແລ້ວວ່າບໍ່ລອດແນ່ນອນ ແຕ່ໂຊກດີທີ່ມີຊາວບ້ານມາຊ່ວຍທັນແລ້ວຊ່ວຍນຳສົ່ງໄປໂຮງໝໍ.

ສ່ວນອາການຂອງຍາຄູມາຮອດມື້ນີ້ແມ່ນດີຂຶ້ນແລ້ວລະດັບໜຶ່ງ ແຕ່ແພດຍັງຕ້ອງດູແລຢ່າງໃກ້ສິດເປັນຫ່ວງບາດແຜຕິດເຊື້ອ ແລະຕ້ອງສີດຢາວັກຊິນກັນພິດໝາວໍ້ ຫາກກາຍໜຶ່ງອາທິດບາດແຜບໍ່ມີບັນຫາແມ່ນສາມາດອອກຈາກໂຮງໝໍໄດ້.

ສ່ວນເຈົ້າຂອງໝາກໍ່ບໍ່ໄດ້ນິ້ງນອນໃຈ ທັງໄດ້ອອກມາຮັບຜິດຊອບເຫດການທີ່ເກີດຂຶ້ນ ແລະບອກວ່າໝາກຸ່ມນີ້ປົກກະຕິກໍ່ຂັງໄວ້ ແຕ່ມື້ເກີດເຫດຕົນບໍ່ຢູ່ເຮືອນໝາຈິ່ງລອດຮົ້ວອອກໄປໜ້າທາງແຕ່ຕອນໃດບໍ່ຮູ້, ສ່ວນທາງຍາຄູເພິ່ນກໍ່ບໍ່ໄດ້ຖືໂທດໂກດແຄ້ນ ມີແຕ່ຝາກບອກໃຫ້ເຈົ້າຂອງໝາກັກຂັງໝາຕົນເອງໃຫ້ດີ ເພື່ອບໍ່ໃຫ້ກໍ່ເຫດຊ້ຳອີກ.

LEAVE A REPLY

Please enter your comment!
Please enter your name here