ຜູ້ແທນປະຊາຊົນລົງຢ້ຽມຢາມຄວາມທຸກສຸກຊາວບ້ານທີ່ເມືອງຊຽງຮ່ອນ

0
60
loading...

ວັນທີ 15 ພືດສະພາ 2018 ນີ້ຢູ່ທີ່ສະໂມສອນເມືອງຊຽງຮ່ອນ ສະມາຊິກສະພາແຫ່ງຊາດ ເຂດເລືອກຕັ້ງທີ 7 ແລະ ສະມາຊິກສະພາປະຊາຊົນແຂວງໄຊຍະບູລີ(ຜູ້ແທນທີ່ປະຊາຊົນເລືອກມາເປັນຕົວແທນຕົນເອງເຂົ້າໄປນັ່ງຢູ່ໃນສະພາ) ໄດ້ລົງເຄື່ອນໄຫວ ຕິດຕາມການກວດກາການຈັດຕັງປະຕິບັດ ມະຕິຂອງກອງປະຊຸມໃຫຍ່ ສະພາປະຊາຊົນ ແຂວງໄຊຍະບູລີ ຢູ່ເມືອງຊຽງຮ່ອນ ນຳພາທີມງານໂດຍ ຂອງທ່ານ ນາງ ອິດມະນີ ຈັນທະຄູນ ສະມາຊິກສະພາແຫ່ງຊາດ ຮອງປະທານສະພາປະຊາຊົນຂັ້ນແຂວງໄຊຍະບູລີ ມີທ່ານ ສຳລານ ແປງສະຫວ່າງ ເຈົ້າເມືອງໆຊຽງຮ່ອນ ມີບັນດາທ່ານ ສະມາຊິກສະພາປະຊາຊົນຂັ້ນແຂວງປະຈຳເຂດເລືອກຕັ້ງເມືອງຊຽງຮ່ອນ ພະນັກງານຫຼັກແຫ່ງອ້ອມຂ້າງເມືອງ ອຳນາດການປົກຄອງບ້ານ ຕະຫຼອດຮອດນັກທຸລະກິດພາຍໃນເມືອງເຂົ້າຮ່ວມ.

ໃນໂອກາດຕ້ອນຮັບສະມາຊິກສະພາແຫ່ງຊາດ ແລະ ສະພາປະຊາຊົນແຂວງຄັ້ງນີ້ ທ່ານ ສຳລານ ແປງສະຫວ່າງ ເຈົ້າເມືອງໆຊຽງຮ່ອນ ໄດ້ຂື້ນລາຍງານສະພາບວຽກງານຮອບດ້ານໃນໄລຍະ 1 ປີຜ່ານມາ ໂດຍໄດ້ຍົກໃຫ້ເຫັນ ທົ່ວເມືອງຮັກສາໄດ້ສະຖຽນສະພາບທາງດ້ານການເມືອງໝັກແໜ້ນ ລະບົບການເມືອງໄດ້ຮັບການປັບປຸງດີຂຶ້ນ ການຄຸ້ມຄອງລັດ-ຄຸ້ມຄອງສັງຄົມດ້ວຍລະບຽບກົດໝາຍສັງຄົມມີຄວາມສະຫງົບມີຄວາມເປັນລະບຽບຮຽບຮ້ອຍໂດຍພື້ນຖານເສດຖະກິດມີການຂະຫຍາຍຕົວຢ່າງຕໍ່ເນື່ອງ, ວຽກງານວັດທະນະທໍາສັງຄົມໄດ້ຮັບການພັດທະນາ.

ຈາກນັ້ນຮອງປະທານສະພາປະຊາຊົນຂັ້ນແຂວງໄຊຍະບູລີໄດ້ມີຄໍາຖາມເຈາະຈີ້ມບາງບັນຫາສໍາຄັນຄື: ວຽກງານວັດທະນະທໍາ-ສັງຄົມ, ການສຶກສາ, ອັດຕາເຂົ້າຮຽນແຕ່ລະຊັ້ນຂອງເດັກນ້ອຍ, ອັດຕາການປະລະຂອງນັກຮຽນ, ວຽກງານຍຸດຕິທໍາ,ວຽກງານປ້ອງກັນຊາດປ້ອງກັນຄວາມສະຫງົບ, ວຽກງານກະສິກໍາ, ການຄ້າ, ວຽກງານສາທາລະນະສຸກ, ແນວລາວສ້າງຊາດ ແລະ ວຽກງານພັດທະນາຊົນນະບົດ ແລະ ລຶບລ້າງຄວາມທຸກຍາກ, ບັນດາໂຄງການທີ່ສະພາອານຸມັດ.

ທ່ານ ນາງ ອິດມະນີ ຈັນທະຄູນ ສະມາຊິກສະພາແຫ່ງຊາດຮອງປະທານສະພາປະຊາຊົນແຂວງໄຊຍະບູລີໄດ້ໃຫ້ກຽດໂອ້ລົມໂດຍເນັ້ນໜັກໃຫ້ອໍານາດການປົກຄອງເມືອງເອົາໃຈໃສ່ສືບຕໍ່ແຜນການລົງທຶນທີສະພາອານຸມັດໃຫ້ສໍາເລັດຕາມແຜນເປັນຕົ້ນແມ່ນເສັ້ນທາງ, ສຶບຕໍ່ຊຸກຍູ້ວຽກງານຊັບພະຍາກອນມະນຸດ, ສຶກສາອົບຮົມການປະລະຂອງນັກຮຽນ, ເຜີຍແຜ່ນິຕິກໍາຕ່າງໆທີ່ກ່ຽວຂ້ອງກັບການສຶກສາລົງສູ່ຮາກຖານ ແລະ ເອົາໃຈໃສ່ການຕ້ານສະກັດກັ້ນບັນຫາຢາເສບຕິດໃຫ້ຫລຸດນ້ອຍຖອຍລົງເທື່ອລະກ້າວ.

ແລະ ທາງທີມງານແຂວງ, ເມືອງຍັງໄດ້ລົງກວດກາເສັ້ນທາງລະຫວ່າງບ້ານທົ່ງກາບ-ບ້ານຫ້ວຍຕອງ, ກວດກາຊຸກຍູ້ຄ້າຍຄຸມຂັງດັດສ້າງຂອງເມືອງ ແລະ ໄດ້ນໍາເອົາສັງກະສີໄປມອບໃຫ້ໂຮງຮຽນມັດທະຍົມຕອນຕົ້ນລາວສະໂນຈໍານວນ 50 ແຜ່ນ ລວມມູມຄ່າ 1,500,000 ກີບ ເພື່ອນໍາໃຊ້ເຂົ້າໃນການປັບປຸງອາຄານຮຽນໃຫ້ພຽງພໍກັບຄວາມຮຽກຮ້ອງຕ້ອງການໃນການຮຽນການສອນຂອງໂຮງຮຽນແຫ່ງດັ່ງກ່າວ.

ຂອບໃຈແຫຼ່ງຂ່າວຈາກ: ວິທະຍຸກະຈາຍສຽງແຫ່ງຊາດ

LEAVE A REPLY

Please enter your comment!
Please enter your name here