ກາຍເປັນຜູ້ຮ້າຍຍ້ອນຄິດວ່າໝູ່ເປັນໝູປ່າ

0
94

 

ມີໃຫ້ເຫັນເລື້ອຍມາສຳລັບການຊວນກັນໄປລ່າເນື້ອແລ້ວຍິງໝູ່ດຽວກັນ ຍ້ອນຄິດວ່າເປັນສັດປ່າແນມເຫັນເປັນກວາງເປັນຟານ ໄປສາລະພັດສຸດແລ້ວແຕ່ພາບລວງຕາຈະພາໄປ ເຫດການຫຼ້າສຸດນີ້ກໍ່ແມ່ນຊາຍໜຸ່ມແຂວງຈຳປາສັກ.

ຕາມການລາຍງານຂອງເຈົ້າໜ້າທີ່່ ພະແນກສືບສວນສອບສວນ ປກສ ແຂວງຈຳປາສັກໃຫ້ຮູ້ວ່າ: ເຫດການດັ່ງກ່າວເກີດຂຶ້ນຢູ່ບ້ານຫ້ວຍເຕົ່າ ເມືອງປາກຊ່ອງ ແຂວງຈຳປາສັກ ເລື່ອງມີຢູ່ວ່າວັນທີ 23 ເມສາ 2018 ມີທ້າວ ທອງຄຳ ອາຍຸ 24 ປີ ແລະ ທ້າວ ສຸກສາຄອນ ອາຍຸ 18 ປີ ທັງສອງຢູ່ບ້ານດຽວກັນ ໄດ້ຊວນກັນໄປລ່າສັດຢູ່ປ່າຫ່າງຈາກບ້ານປະມານ 15 ກິໂລແມັດ ຢູ່ເຂດພູນ້ຳທ່ຽງ ຮອດຕອນຄ່ຳຂອງວັນດຽວກັນ ທັງສອງໄດ້ພາກັນພັກຢູ່ທີ່ນັ້ນ ຮອດເວລາ 2 ໂມງຂ້ອນແຈ້ງພວກກ່ຽວຈິ່ງໄດ້ຊວນກັນລຸກໄປລ່າສັດ ເພື່ອຊອກຍິງໝູປ່າ ໄດ້ປະມານ 40 ນາທີ ແຕ່ກໍ່ບໍ່ເຫັນຫຍັງ ຈິ່ງພາກັນກັບມານອນຢູ່ບ່ອນເກົ່າ.

ພໍຮອດເວລາ 4 ໂມງເຊົ້າ ທ້າວ ທອງຄຳ ໄດ້ຍິນສຽງດັງຄ້າຍຄືໝູປ່າ ຜູ້ກ່ຽວຈິ່ງໄດ້ເອົາໂຄມໄຟເຍືອງໃສ່ ຈິ່ງເຫັນເປັນຕາສີແດງ ຄ້າຍຄືໝູປ່າ ຈິ່ງໄດ້ເອົາປືນຍິງໃສ່ 1 ນັດ ແລ້ວແລ່ນໄປເບິ່ງ ຈິ່ງເຫັນວ່າ ເປັນ ທ້າວ ສຸກສາຄອນ ຖືກຍິງເສຍຊີວິດ. ເມື່ອເປັນເຊັ່ນນັ້ນ ທ້າວ ທອງຄຳ ຄິດຢ້ານ ຈິ່ງກັບມາບ້ານແລ້ວບໍ່ບອກໃຜ. ສ່ວນປືນແມ່ນໄດ້ຖິ້ມໄວ້ຂ້າງສົບ ທ້າວ ສຸກສາຄອນ. ຕົກມາຮອດວັນທີ 27 ເມສາ 2018 ເວລາ 15 ໂມງ ຈິ່ງຖືກເຈົ້າໜ້າທີ່ກັກຕົວ ເພື່ອມາດໍາເນີນຄະດີຕາມລະບຽບກົດໝາຍບ້ານເມືອງຕໍ່ໄປ.

ຂ່າວຈາກ: ໜັງສືພິມຈໍາປາໃໝ່

LEAVE A REPLY

Please enter your comment!
Please enter your name here