ວ່າຈັ່ງໃດດີ ປິດຊີບໂຕເອງເພາະຜູ້ຊາຍ

0
110

ຊີວິດເຮົາມັນສັ້ນ ບໍ່ຄວນຄິດເລັກຄິດນ້ອຍກັບຄົນທີ່ບໍ່ໄດ້ລ້ຽງເກືອເຮົາໃຫ້ໃຫຍ່ໂຕ ຈັ່ງວ່າແລນໍຄວາມຮັກມັກເຮັດໃຫ້ຄົນຕາບອດ ໂດຍສະເພາະແມ່ນຮັກຂອງໜຸ່ມສາວທີ່ຍັງບໍ່ທັນຄິດຫຍັງເປັນ ຈິ່ງກາຍເປັນທີ່ມາຂອງການຈົບຊີວິດຂອງຫຼາຍໆຄົນ ໃນນັ້ນແມ່ນລວມທັງສາວຫວຽດນາມ ໄວ 25 ປີທີ່ປາກເຊ.

ຕາມຂ່າວຈາກໜັງສືພິມຈຳປາໃໝ່ ໂດຍອ້າງອີງການລາຍງານຈາກ ທ່ານ ພັນໂທ ໄພຈິດ ໄຊຍະເດດ ຮອງຫົວໜ້າຫ້ອງຕຳຫຼວດ ຜູ້ຊີ້ນຳວຽກງານສືບສວນສອບສວນກອງບັນຊາການ ປກສ ແຂວງຈຳປາສັກ ໃຫ້ຮູ້ວ່າ: ເວລາ 9:00 ໂມງຂອງວັນທີ 29 ເມສາ 2018 ໄດ້ຮັບລາຍງານຈາກພົນລະເມືອງດີວ່າ: ໄດ້ພົບເຫັນສົບຄົນຕາຍໄຫຼນ້ຳຢູ່ສົ້ນຂົວຂ້າມແມ່ນ້ຳຂອງລາວ-ຍີ່ປຸ່ນ ເຂດບ້ານໂພນກຸງເມືອງປາກເຊ ຈາກນັ້ນ ທາງເຈົ້າໜ້າທີ່ຈິ່ງໄດ້ປະສານສົມທົບກັບພາກສ່ວນທີ່ກ່ຽວຂ້ອງ ລົງກວດກາສະຖານທີ່ເກີດເຫດ ຈິ່ງຮູ້ວ່າຜູ້ເສຍຊີວິດຊື່ ນາງ ຫງວຽນກິມເກ່ ອາຍຸ 25 ປີ ອາຊີບກຳມະກອນ ສັນຊາດຫວຽດນາມ ຢູ່ບ້ານ ເອິນແທັງຮີ ຄຸ້ມແທັງດຽນ ເມືອງ ຫຽນເຈົາແທັງ ແຂວງເຕີ່ຍນິ່ງ ສສ ຫວຽດນາມ ໄດ້ມາພັກເຊົາຢູ່ບ້ານໂພນກຸງ ເມືອງປາກເຊ ແຂວງຈຳປາສັກ.

ຜ່ານການສືບສວນສອບສວນ ນາງ ເຈິນກິມເຮືອງ ຜູ້ເປັນເອື້ອຍ ມີອາຊີບຄ້າຂາຍ ພັກເຊົາຢູ່ບ້ານໂພນສະຫວັນ ເມືອງປາກເຊ ໃຫ້ການວ່າ: ໃນປີ 2011 ນາງ ເຈິນກິມເຮືອງ ອາຍຸ 35ປີ ແລະ ຜົວ ຊື່ ທ້າວ ຫວໍວັນເຢີ ອາຍຸ 37ປີ ສັນຊາດຫວຽດນາມໄດ້ມາຄ້າຂາຍຢູ່ເມືອງປາກເຊ. ຈົນຮອດປີ 2016 ນ້ອງສາວຊື່ ນາງ ຫງວຽນກິມເກ່(ຜູ້ເສຍຊີວິດ) ກໍ່ໄດ້ມາຢາມຢູ່ເມືອງປາກເຊ. ຕົກມາຮອດເດືອນຕຸລາ ປີ 2017 ນາງ ຫງວຽນກິມເກ່ ໄດ້ມາຮູ້ຈັກຮັກກັນກັບທ້າວ ຮວນ ອາຍຸ 20ປີ ສັນຊາດຫວຽດນາມ ທີ່ມາຫາເຮັດອາຊີບຕີຄຳຢູ່ເມືອງປາກເຊ. ຈາກນັ້ນ ຮອດຕົ້ນເດືອນກຸມພາ ປີ 2018 ທາງພໍ່ແມ່ ທ້າວ ຮວນ ໄດ້ຮູ້ວ່າທັງສອງມັກຮັກກັນແບບຊູ້ສາວແລ້ວຈິ່ງບອກໃຫ້ເລີກກັນ.ຈິ່ງເຮັດໃຫ້ ນາງ ຫງວຽນກິມເກ່ ເກີດຄວາມໂສກເສົ້າເສຍໃຈ.

 

ທີ່ມາຂອງການເສຍຊີວິດນັ້ນຕາມຄາດການອາດເປັນຍ້ອນຄວາມເສຍໃຈ ຊຶ່ງເຫດເກີດຂຶ້ນຫຼັງຈາກຜູ້ເປັນເອື້ອຍໄດ້ພາຜູ້ເສຍຊີວິດໄປກວດທ້ອງເມື່ອວັນທີ 4 ເມສາ 2018 ນແລ້ວຮູ້ວ່າ ນາງ ຫງວຽນກິມເກ່ຖືພາ ຈາກນັ້ນ ທ້າວ ຮວນ ໄດ້ບອກ ນາງ ຫງວຽນກິມເກ່ ວ່າຈະໄປຫາພໍ່ແມ່ແລ້ວມາຂໍຜູ້ກ່ຽວແຕ່ງງານ ແຕ່ທາງຄອບຄົວ ທ້າວ ຮວນ ບໍ່ອະນຸຍາດໃຫ້ແຕ່ງງານກັບ ນາງ ຫງວຽນກິມເກ່ ພ້ອມທັງໃຫ້ລູກຊາຍໄປເຮັດວຽກຢູ່ນະຄອນຫຼວງວຽງຈັນ. ເມື່ອເປັນແນວນັ້ນ ນາງ ຫງວຽນກິມເກ່ ໄດ້ເກີດອາການຊຶມເສົ້າ,ບໍ່ປາກບໍ່ເວົ້ານຳໃຜມີແຕ່ນອນໃຫ້ໃນຫ້ອງຄົນດຽວ.

ຕົກຮອດວັນທີ 10 ເມສາ 2018 ນາງ ຫງວຽນກິມເກ່ ໄດ້ຕັດສິນໃຈກິນຢາເອົາລູກອອກ, ຈົນມາຮອດວັນທີ 27 ເມສາ 2018 ເວລາ 18:00 ໂມງ ນາງ ເຈິນກິມເຮືອງ ຜູ້ເປັນເອື້ອຍ ໄດ້ກັບມາແຕ່ຂາຍເຄື່ອງຢູ່ເມືອງຈຳປາສັກ ແລ້ວໄປຫາ ນາງ ຫງວຽນກິມເກ່ ຢູ່ທີ່ຮ້ານຂາຍເສື້ອຜ້າຂອງ ວໍທິເວີນ ແລ້ວຖາມນ້ອງສາວວ່າ: “ກິນເຂົ້າແລ້ວບໍ?” ແຕ່ນາງ ບໍ່ຕອບຫຍັງມີແຕ່ໄຫ້ແລ້ວແລ່ນຂຶ້ນໄປນອນ.

ຈາກນັ້ນເວລາປະມານ 22:00ໂມງ ໄດ້ເຫັນ ນາງ ຫງວຽນກິມເກ່ ນຸ່ງຊຸດນອນສາຍດ່ຽວ ແລະ ນຸ່ງເສື້ອແຂນຍາວສີເທົາປົກນອກ,ນຸ່ງໂສ້ງຂາສັ້ນສີບົວ ກຳລັງຍ່າງຂ້າມທາງໄປແຄມຂອງ ຕົນເອງຈິ່ງໄດ້ຮ້ອງໃສ່ວ່າ: “ເຂົ້າມານອນທະແມ” ນາງ ຫງວຽນກິມເກ່ ຕອບວ່າໄປນັ່ງຫຼິ້ນກ່ອນຢູ່ນອກອາກາດເຢັນ. ຕໍ່ຈາກນັ້ນກໍ່ບໍ່ເຫັນນ້ອງສາວກັບມາອີກເລີຍ ຈິ່ງໄດ້ສົ່ງຂໍ້ຄວາມທາງ MESSENGER ໄປຫາ ທ້າວ ຮວນ ແຕ່ ທ້າວ ຮວນ ຕອບວ່າບໍ່ເຫັນ,ນ້ອງມາເຮັດວຽກຢູ່ວຽງຈັນພີ້.

ຫຼັງຈາກນ້ອງສາວຫາຍໄປທາງຄອບຄົວໄດ້ອອກຕາມຫາທົ່ວຕົວເມືອງປາກເຊ ແຕ່ກໍ່ບໍ່ເຫັນ. ຈົນມາຮອດວັນທີ 29 ເມສາ 2018 ຈິ່ງຮູ້ຂ່າວວ່າມີຄົນຕາຍໄຫຼນ້ຳ ຢູ່ສົ້ນຂົວຂ້າມແມ່ນ້ຳຂອງລາວ-ຍີ່ປຸ່ນ ເຂດບ້ານໂພນກຸງເມືອງປາກເຊ ຈາກນັ້ນ ທາງ ນາງ ເຈິນກິມເຮືອງ ຜູ້ເປັນເອື້ອຍ ຈິ່ງໄດ້ອອກໄປເບິ່ງແລ້ວພົບວ່າເປັນສົບຂອງນາງ ຫງວຽນກິມເກ່ ຜູ້ເປັນນ້ອງສາວ.

ຕໍ່ເຫດການທີ່ເກີດຂຶ້ນປັດຈຸບັນ ທາງເຈົ້າໜ້າທີ່ຈະໄດ້ນຳເອົາໂທລະສັບຂອງ ນາງ ຫງວຽນກິມເກ່ ໄປປົດລອ໋ກ ເພື່ອກວດກາເກັບກຳຂໍ້ມູນ ແລະ ສອບສວນເກັບກຳຂໍ້ມູນເພີ່ມຕື່ມນຳ ທ້າວ ຮວນ ຜູ້ເປັນແຟນຕໍ່ໄປ.

LEAVE A REPLY

Please enter your comment!
Please enter your name here