ສະພາການຄ້າ-ທະນາຄານພັດທະນາລາວຈະຮ່ວມສ້າງບັນດາວິສາຫະກິດ

0
84
loading...

ໃນວັນທີ 11 ພຶດສະພາ 2018, ເວລາ 14:30 ທີ່ຫ້ອງປະຊຸມຊັ້ນ VI, ທະນາຄານພັດທະນາລາວ ສຳນັກງານໃຫຍ່ ໄດ້ຈັດ ພິທີເຊັນບົດບັນທຶກຊ່ວຍຈຳວ່າດ້ວຍ “ວຽກງານການຮ່ວມມືລະຫວ່າງ ສະພາການຄ້າ ແລະ ອຸດສາຫະກຳແຫ່ງຊາດລາວ (ສຄອຊ) ແລະ ທະນາຄາພັດທະນາລາວ ໂດຍການເປັນປະທານຂອງ ທ່ານ ດາວວອນ ພະຈັນທະວົງ ຮອງປະທານ ສຄອ ແຫ່ງຊາດລາວ, ທ່ານ ບົວລຽນ ພົມມະວົງສາ ຜູ້ອໍານວຍການໃຫຍ່ ທະນາຄານພັດທະນາລາວ, ທ່ານ ສຽວສະຫວາດ ສະແຫວງສຶກສາ ປະທານທີ່ປຶກສາກິດຕິມະສັກ ສຄອຊ ແລະ ທ່ານ ໂຢຊິຮາລຸ ໂຢເນຢາມະ ຜຸ້ຕາງໜ້າອົງການໄຈກາປະຈໍາລາວ.

ທັ້ງນີ້ກໍເພື່ອພ້ອມກັນສ້າງບັນດາວິສາຫະກິດຂະໜາດນ້ອຍ ແລະ ກາງ ໃນລາວໄດ້ມີບາດກ້າວໃໝ່, ເພີ່ມບົດບາດສຳຄັນຕໍ່ການພັດທະນາເສດຖະກິດ-ສັງຄົມ ໂດຍສະເພາະແມ່ນການຜະລິດສິນຄ້າ, ການຄ້າ ແລະ ການບໍລິການ, ປະກອບສ່ວນເຂົ້າໃນການສ້າງວຽກເຮັດງານທຳ, ສ້າງລາຍຮັບ ແລະ ຍົກສູງຊີວິດການເປັນຢູ່ຂອງປະຊາຊົນ ກໍ່ຄືການສ້າງປະຖົມປັດໄຈໃຫ້ແກ່ການເປັນ ອຸດສາຫະກຳ ແລະ ທັນສະໄໝເທື່ອລະກ້າວ.

ເປັນທີ່ຮູ້ກັນດີແລ້ວວ່າ ບັນດາວິສາຫະກິດຂະໜາດນ້ອຍ ແລະ ກາງ ແມ່ນອົງປະກອບທີ່ສຳຄັນຂອງເສດຖະກິດແຫ່ງຊາດ ສະນັ້ນລັດຖະບານຈິ່ງໄດ້ສ້າງກົນໄກ ແລະ ສ້າງໜ່ວຍງານສະເພາະຂຶ້ນມາເພື່ອຮັບຜິດຊອບຢ່າງຈິງຈັງ ແລະ ເປັນລະບົບຕໍ່ເນື່ອງ.

ສະພາການຄ້າ ແລະ ອຸດສາຫະກຳ ແຫ່ງຊາດລາວ ໄດ້ໃຫ້ຄວາມສຳຄັນ ແລະ ເອົາໃຈ ໃສ່ໃນການສົ່ງເສີມວິສາຫະກິດຂະໜາດນ້ອຍ ແລະ ກາງ ໂດຍການສ້າງຕັ້ງສູນບໍລິການວິສາຫະກິດຂະໜາດນ້ອຍ ແລະ ກາງຂຶ້ນຢ່າງເປັນທາງການ ໃນວັນທີ 17 ກຸມພາ 2017 ເພື່ອເປັນສະຖານທີ່ ສຳລັບໃຫ້ບໍລິການແກ່ຜູ້ປະກອບກິດຈະການ ວິສາຫະກິດຂະໜາດນ້ອຍ ແລະ ກາງ ໃນ ສປປລາວ ທາງດ້ານບົດຮຽນ, ຄວາມຮູ້, ເຕັກໂນໂລຊີ, ແລະ ປະສົບການ.

ສູນດັ່ງກ່າວນັ້ນ ຈະເປັນສະຖານການຮຽນຮູ້ເພື່ອຕໍ່ຍອດ ແລະ ຍົກລະດັບ ດ້ານການຄຸ້ມຄອງບໍລິຫານ, ພັດທະນາດ້ານ ການຜະລິດ ແລະ ນະວັດຕະກຳໃໝ່, ການຫຸ້ມຫໍ່, ການຕະຫຼາດສ້າງໃຫ້ຜະລິດຕະພັນລາວ ຫຼື ກາໝາຍ/ຍີ່ຫໍ້ລາວໃຫ້ເປັນທີ່ຍອມຮັບ/ຮັບຮູ້ ແລະ ໄດ້ຮັບຄວາມສົນໃຈຈາກຜູ້ບໍລິໂພກໃນພາກພື້ນ ແລະ ໃນໂລກ.

ແນວໃດກໍ່ຕາມ ສະພາບການໂດຍລວມຂອງວິສາຫະກິດຂະໜາດນ້ອຍ ແລະ ກາງໃນ ສປປ ລາວ ຍັງປະສົບພົບພໍ້ກັບສິ່ງທີ່ທ້າທາຍຫຼາຍຢ່າງ ໜຶ່ງໃນນັ້ນແມ່ນ “ການເຂົ້າເຖິງແຫຼ່ງເງິນທຶນ” ເພື່ອນັ້ນເພື່ອຕັດບັນຫາດັ່ງກ່າວສະພາອຸດສາຫະກຳ ແລະການຄ້າ ຈິ່ງໄດ້ຮ່ວມມືກັບທະນາຄານພັດທະນາລາວ ເພື່ອພ້ອມກັນແກ້ໄຂໂດຍສະເພາະສະພາການຄ້າທີ່ໃກ້ສິດຕິດແທດກັບຫົວໜ່ວຍທຸລະກິດຈະຊ່ວຍຄັດສັນບໍລິສັດທີ່ມີຄຸນນະພາບໃຫ້ສາມາດເຂົ້າຫາແຫຼ່ງທຶນໄດ້. ໃນເວລາດຽວກັນໃຫ້ທະນາຄານມີຄວາມໝັ້ນໃຈການປ່ອຍເງິນກູ້ ບໍ່ໃຫ້ກາຍເປັນໜີ້ເສຍ.

ສະນັ້ນ, ບົດບັນທຶກຊ່ວຍຈຳທີ່ທັງສອງຝ່າຍຮ່ວມລົງນາມຄັ້ງນີ້ ຈະເປັນນິມິດໝາຍອັນດີ ໃນການຮ່ວມມື ແລະ ສະໜັບສະໜູນ ສົ່ງເສີມເຊິ່ງກັນ ແລະ ກັນເພື່ອອຳນວຍຄວາມສະດວກໃນການພັດທະນາຜູ້ປະກອບກິດຈະການ ວິສາຫະກິດຂະໜາດນ້ອຍ ແລະ ກາງ ໃນ ສປປລາວ ຕະຫຼອດຮອດການສ້າງຄວາມຕໍ່ເນື່ອງຂອງກິດຈະກຳທີ່ກ່ຽວຂ້ອງເພື່ອໃຫ້ນຳໄປສູ່ການປ່ຽນແປງ ໃນທາງພາກປະຕິບັດໄດ້ຢ່າງແທ້ຈິງ.

LEAVE A REPLY

Please enter your comment!
Please enter your name here