ທ່ານ ນາຍົກ ໂອ້ລົມການນໍາແຂວງ ບໍລິຄໍາໄຊ ເອົາໃຈໃສ່ແກ້ໄຂຢ່າງເດັດຂາດຕໍ່ກັບປະກົດການຫຍໍ້ທໍ້ 4 ເຖື່ອນ

0
185
????????????????????????????????????

ພາຍຫຼັງສໍາເລັດການເຮັດວຽກຢູ່ເມືອງ ໄຊຈໍາພອນ ໃນຕອນບ່າຍຂອງວັນທີ 10 ພຶດສະພາ 2018 ທ່ານ ທອງລຸນ ສີສຸລິດ ນາຍົກລັດຖະມົນຕີ ໄດ້ສືບຕໍ່ນຳພາຄະນະ ໄປເຄື່ອນໄຫວເຮັດວຽກ ແລະ ໂອ້ລົມຄະນະພັກ, ຄະນະນໍາ, ພະ ນັກງານຫຼັກແຫຼ່ງ ພາຍໃນແຂວງບໍລິຄໍາໄຊ ໂດຍໄດ້ຮັບການຕ້ອນຮັບຢ່າງອົບອຸ່ນ ຈາກທ່ານ ກອງແກ້ວ ໄຊສົງຄາມ ເຈົ້າແຂວງໆບໍລິຄໍາໄຊ ພ້ອມດ້ວຍ ຄະນະນຳຂອງແຂວງ, ເມືອງ, ບັນດາພະແນກການ ແລະ ພາກສ່ວນທີ່ກ່ຽວຂ້ອງພາຍໃນແຂວງດັ່ງກ່າວ.

ກ່ອນອື່ນທ່ານ ເຈົ້າແຂວງໆບໍລິຄໍາໄຊ ໄດ້ລາຍງານສະພາບການພັດທະນາເສດຖະກິດ-ສັງຄົມໂດຍຫຍໍ້ ໃຫ້ແກ່ຄະນະຂອງທ່ານ ນາຍົກລັດຖະມົນຕີ ພ້ອມດ້ວຍຄະນະ ໃນການເດີນທາງການມາເຮັດວຽກຄັ້ງນີ້ ຊາບວ່າ: ທົ່ວແຂວງສືບຕໍ່ມີຄວາມສະຫງົບທາງດ້ານການເມືອງ, ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍໂດຍພື້ນຖານ, ໃນປີ 2017 ຜ່ານມາ ແຂວງໄດ້ເອົາໃຈໃສ່ແກ້ໄຂປະກົດການຫຍໍ້ທໍ້ ທີ່ຕິດພັນ 04 ເຖື່ອນ (ຄົນເຖື່ອນ, ລົດເຖື່ອນ, ອາວຸດເຖື່ອນ ແລະ ສິນຄ້າເຖື່ອນ); ໄດ້ເພີ່ມທະວີຄວາມເຂັ້ມງວດໃນການຄຸ້ມຄອງ, ກວດກາການຂຸດຄົ້ນ, ການເຄື່ອນຍ້າຍໄມ້ ແລະ ທຸລະກິດໄມ້, ພ້ອມທັງ ເຊື່ອມຊຶມຄໍາສັ່ງດັ່ງກ່າວຢ່າງກວ້າງຂວາງ ນັບແຕ່ແຂວງລົງຮອດຂັ້ນເມືອງ ແລະ ຮາກຖານບ້ານ, ເພື່ອເປັນການຕ້ານ, ສະກັດກັ້ນ ແລະ ແກ້ໄຂປະກົດການຫຍໍ້ທໍ້ໃນຂົງເຂດວຽກງານປ່າໄມ້; ສໍາລັບການພັດທະນາເສດຖະກິດສັງຄົມ ມີທ່ວງທ່າດີຂຶ້ນ ຊີວິດການເປັນຢູ່ຂອງປະຊາຊົນ ໄດ້ຮັບການພັດທະນາ ແລະ ປັບປຸງດີຂຶ້ນເປັນກ້າວໆ, ການເກັບລາຍຮັບຈາກບັນດາຫົວໜ່ວຍທຸລະກິດຕ່າງໆ ແມ່ນບັນລຸຕົວເລກຕາມຄາດໝາຍທີ່ວາງໄວ້.

ໃນປີ 2017 ເສດຖະກິດຂອງແຂວງ ໄດ້ສືບຕໍ່ມີການເຕີບໂຕຢ່າງຕໍ່ເນື່ອງ ລວມຍອດຜະລິດພັນພາຍໃນ (GDP) ບັນລຸ 5.041 ຕື້ກີບ ສະເລ່ຍໃສ່ຫົວຄົນໄດ້ 2.151 ໂດລາຕໍ່ປີ ເທົ່າກັບ 17,9 ລ້ານກີບ/ຄົນ; ທົ່ວແຂວງ ຍັງມີຄອບຄົວທຸກຍາກ ຈໍານວນ 1.436 ຄອບຄົວ ກວມເອົາປະມານ 2,76% ຂອງຈໍານວນຄອບຄົວທັງໝົດ, ມີບ້ານທຸກຍາກ 31 ບ້ານ ເທົ່າກັບ 11% ຂອງຈໍານວນບ້ານທັງໝົດ; ໄດ້ຫັນລົງກໍ່ສ້າງຮາກຖານການເມືອງ ມີພະນັກງານທັງໝົດ 166 ສະຫາຍ, ຍິງ 4 ສະຫາຍ ໃນຮູບແບບລົງປົກກະຕິ ປະຈຳບ້ານທີ່ຫຼໍ່ແຫຼມ ແລະ ລົງຕາມສາຍຕັ້ງ; ໄດ້ຊຸກຍູ້ໃຫ້ປະຊາຊົນທໍາການຜະລິດກະສິກໍາ ເພື່ອຂະຫຍາຍເນື້ອທີ່ການຜະລິດ ໃຫ້ໄດ້ຫຼາຍ ແລະ ກາຍເປັນສິນຄ້າ; ການພົວພັນ-ຮ່ວມມືກັບຕ່າງປະເທດ ໄດ້ເປັນເຈົ້າການເສີມຂະຫຍາຍ ສາຍພົວພັນຮ່ວມມືຮອບດ້ານ ກັບບັນດາແຂວງທີ່ມີຊາຍແດນຕິດຈອດກັນ ດ້ວຍການສ້າງເງື່ອນໄຂ, ອໍານວຍຄວາມສະດວກ ໃຫ້ແກ່ການລົງທຶນດ້ານຕ່າງໆ ກໍ່ຄື ການມາເຄື່ອນໄຫວຢ້ຽມຢາມ ແລະ ອື່ນໆ.

ພາຍຫຼັງໄດ້ຮັບຟັງການລາຍງານ, ທ່ານນາຍົກລັດຖະມົນຕີ ກໍ່ໄດ້ສະແດງຄວາມຍ້ອງຍໍຊົມເຊີຍ ບັນດາຜົນສໍາເລັດໃນແຕ່ລະດ້ານ ທີ່ແຂວງສາມາດຍາດມາໄດ້ໃນໄລຍະຜ່ານມາ ເຊິ່ງສະແດງໃຫ້ເຫັນການຕັດສິນໃຈ, ການປະກອບ ສ່ວນ ແລະ ເອົາໃຈໃສ່ຂອງຄະນະພັກ, ຄະນະນໍາ ກໍ່ຄື ການປະກອບສ່ວນຢ່າງຕັ້ງໜ້າ ເຂົ້າໃນການພັດທະນາເສດຖະກິດສັງຄົມ ຂອງທຸກພາກສ່ວນຢູ່ພາຍໃນແຂວງ ຈົນໄດ້ຮັບການພັດທະນາຢ່າງຮອບດ້ານ ແລະ ດີຂຶ້ນເລື້ອຍໆ ລວມທັງ ການປະກອບສ່ວນເຂົ້າໃນວຽກງານປ້ອງກັນຊາດ-ປ້ອງກັນຄວາມສະຫງົບ ແລະ ເອົາໃຈໃສ່ແກ້ໄຂຢ່າງຈິງຈັງ ຕໍ່ບັນຫາຫຍໍ້ທໍ້ໃນສັງຄົມ.

ໃນໂອກາດນີ້, ທ່ານນາຍົກລັດຖະມົນຕີ ກໍ່ໄດ້ແຈ້ງສະພາບການສາກົນ ໃຫ້ຜູ້ເຂົ້າຮ່ວມກອງປະຊຸມໄດ້ຮັບຊາບວ່າ: ປະຈຸບັນສະພາບສາກົນ ແລະ ພາກພື້ນ ຍັງສືບຕໍ່ຜັນແປໄປຢ່າງສັບສົນ ລະຫວ່າງ ບັນດາປະເທດມະຫາອໍານາດ ຍາກທີ່ຈະຄາດຄະເນໄດ້. ຕໍ່ການພັດທະນາເສດຖະກິດ-ສັງຄົມຂອງແຂວງ ທ່ານນາຍົກລັດຖະມົນຕີ ຍັງໄດ້ເນັ້ນໜັກ ໃຫ້ເອົາໃຈໃສ່ຕື່ມບາງບັນຫາ ເປັນຕົ້ນ: ສືບຕໍ່ເອົາໃຈໃສ່ ວຽກງານປ້ອງກັນຊາດ, ປ້ອງກັນຄວາມສະຫງົບ ເພື່ອໃຫ້ມີຄວາມສະຖຽນລະພາບທາງດ້ານການເມືອງ, ຢູ່ທ້ອງຖິ່ນຮາກຖານບ້ານ ແລະ ການດໍາລົງຊີວິດ ຂອງປະຊາຊົນ ໃຫ້ມີຄວາມສະຫງົບ ແລະ ປອດໄພ; ສິ່ງສໍາຄັນ ແມ່ນໃຫ້ເອົາໃຈໃສ່ແກ້ໄຂຢ່າງເດັດຂາດຕໍ່ກັບປະກົດການຫຍໍ້ທໍ້ 4 ເຖື່ອນ (ຄົນເຖື່ອນ, ລົດເຖື່ອນ, ອາວຸດເຖື່ອນ ແລະ ສິນຄ້າເຖື່ອນ) ທີ່ແຂວງໄດ້ວາງອອກແລ້ວນັ້ນ ຢ່າງສິ້ນເຊີງ; ສືບຕໍ່ຮັກສາມູນເຊື້ອຮັກຊາດ ແລະ ເສີມຂະຫຍາຍມູນເຊື້ອປະຕິວັດ, ຄວາມສາມັກຄີອັນເປັນປຶກແຜ່ນ ຂອງປະຊາຊົນບັນດາເຜົ່າພາຍໃນແຂວງ; ເອົາໃຈໃສ່ຄຸ້ມຄອງການຈັດເກັບລາຍຮັບ ໃຫ້ຖືກຕ້ອງຄົບຖ້ວນ ສິ່ງສໍາຄັນ ແມ່ນໃຫ້ເອົາເຂົ້າສູ່ບັນດາກົນໄກ, ລະບຽບການ ແລະ ຫັນໄປສູ່ຄວາມທັນສະໄໝ ເພື່ອຮັບປະກັນໃຫ້ມີຄວາມໂປ່ງໄສ ແລະ ຊັດເຈນ ຄຽງຄູ່ກັບການຄຸ້ມຄອງນໍາໃຊ້ງົບປະມານລັດ ຢ່າງປະຢັດມັດທະຍັດ ແລະ ມີປະສິດທິຜົນສູງ;

ສືບຕໍ່ລົງຊຸກຍູ້ວຽກງານກໍ່ສ້າງຮາກການການ ເມືອງ ຕາມ 4 ເນື້ອໃນ 4 ຄາດໝາຍ ແລະ ປະຕິບັດວຽກງານ 3 ສ້າງ ຢູ່ພາຍໃນແຂວງ ໃຫ້ເຂົ້າສູ່ລວງເລິກ (ແນໃສ່ການລົບລ້າງຄວາມທຸກຍາກຂອງປະຊາຊົນ); ສໍາລັບການພັດທະນາພື້ນຖານໂຄງລ່າງ ເວົ້າລວມ, ເວົ້າສະເພາະ ການພັດທະນາກໍ່ສ້າງເສັ້ນທາງ ຢູ່ພາຍໃນແຂວງ ເພື່ອເປັນທ່າແຮງນໍາໃຊ້ ໃຫ້ແກ່ການພັດທະນາເສດຖະກິດສັງຄົມ ແມ່ນມອບໃຫ້ແຂວງ ສົມທົບກັບພາກສ່ວນທີ່ກ່ຽວຂ້ອງ ສຶກສາຄົ້ນຄວ້າ ແລະ ມີແຜນລະອຽດ ວ່າຈະເຮັດແນວໃດ ແລະ ບ່ອນໃດທີ່ມີຄວາມຈໍາເປັນແທ້ ໃນເງື່ອນໄຂປະຈຸບັນ ແລະ ຕໍ່ໜ້າ ທີ່ປະເທດເຮົາ ໄດ້ມີແຜນກໍ່ສ້າງເສັ້ນທາງຄົມມະນາຄົມ ເພື່ອຈອດ ແລະ ເຊື່ອມໂຍງກັບ ບັນດາປະເທດເພື່ອນບ້ານ ທັງນີ້ ກໍ່ເພື່ອເປັນການປະຢັດມັດທະຢັດງົບປະມານຂອງລັດ ແລະ ຫຼີກລ້ຽງການໃຊ້ຈ່າຍຟູມເຟືອຍ. ພ້ອມກັນນັ້ນ ກໍ່ສ້າງສະພາບແວດລ້ອມ ແລະ ເງື່ອນໄຂອຳນວຍຄວາມສະດວກທີ່ດີ ເພື່ອຍາດແຍ່ງເອົາການລົງທຶນທັງພາຍໃນ ແລະ ຕ່າງປະເທດ ໃຫ້ຫຼາຍຂຶ້ນ.

ໃນໂອກາດເດີນທາງໄປເຄື່ອນໄຫວເຮັດວຽກ ຢູ່ແຂວງບໍລິຄໍາໄຊ ຄັ້ງນີ້ ຄະນະຂອງທ່ານ ນາຍົກລັດຖະມົນຕີ ຍັງໄດ້ເດີນທາງໄປ ເຮັດວຽກຮ່ວມກັບ ບໍລິສັດ ບໍ່ຄໍາ ຄໍາເກີດ ແສນອຸດົມ, ໄປວາງພວງມາລາ ຕໍ່ໜ້າຮູບປັ້ນ ທ່ານ ສີສົມພອນ ລໍວັນໄຊ ແລະ ປູກຕົ້ນໄມ້ ເພື່ອເປັນທີ່ລະນຶກ ຢູ່ສວນສາທາລະນະ ຮູບປັ້ນທ່ານ ສີສົມພອນ ລໍວັນໄຊ ຕື່ມອີກ.

ແຫລ່ງ: ກົມປະຊາສຳພັນ, ຫ້ອງວ່າການສຳນັກງານນາຍົກລັດຖະມົນຕີ

LEAVE A REPLY

Please enter your comment!
Please enter your name here