ຊຽງຂວາງເອົາໃຈໃສ່ຄຸ້ມຄອງສິນຄ້າ ແລະລາຄາລວມ 14 ລາຍການ

0
100

ຕາມການເປີດເຜີຍໃນກອງປະຊຸມວຽກງານການຄຸ້ມຄອງສິນຄ້າ-ຄ່າບໍລິການ ແລະ ວຽກງານສົ່ງເສີມຄັດເລືອກສິນຄ້າໜຶ່ງເມືອງ ໜື່ງຜະລິດຕະພັນແຫ່ງຊາດຈັດຂື້ນໃນຕອນເຊົ້າວັນທີ4ພຶດສະພາ 2018 ຜ່ານມາ ໃຫ້ຮູ້ວ່າ: ເຖິງແມ່ນປະຊາຊົນຊາວຊຽງຂວາງຈະມີພື້ນທີ່ຜະລິດກະສິກຳກວ້າງຂວາງ ແຕ່ຈຳນວນທີ່ອາໄສການຊື້ຕາມຕະຫຼາດກໍ່ມີຫຼາຍ ສະນັ້ນຂະແໜງການກ່ຽວຂ້ອງຂອງແຂວງຈິ່ງຕ້ອງໃຫ້ຄວາມສຳຄັນພິເສດໃນການຈັດຕັ້ງຄຸ້ມຄອງສິນຄ້າ ແລະລາຄາໃຫ້ຢູ່ໃນເກນປົກກະຕິ ເພື່ອຄວາມຍຸຕິທຳແກ່ຜູ້ບໍລິໂພກ.

ໃນນີ້ແຂວງຊຽງຂວາງໄດ້ເອົາໃຈໃສ່ຄຸ້ມຄອງລາຄາສິນຄ້າ ລວມມີ 4 ປະເພດ 14 ລາຍການ ແລະ ລາຍການສິນຄ້າທີ່ຕ້ອງຕິດຕາມການເໜັງຕີງຂອງລາຄາປະຈຳອາທິດ 129 ລາຍການ ແລະ ປະຈຳເດືອນ 199 ລາຍການເປັນປົກກະຕິ. ໃນເວລາດຽວກັນ ເພື່ອສາມາດຕອບສະໜອງເຂົ້າແກ່ສັງຄົມຢ່າງພຽງພໍ ບໍ່ໃຫ້ລາຄາມີການເໜັງຕິງແຮງ ໃນຕົ້ນປີ 2018 ໄດ້ເກັບຊື້ເຂົ້າເປືອກ ເຂົ້າຄັງແຮໄວ້ແລ້ວຈຳນວນ 190 ໂຕນ(ເຂົ້າເປືອກໄກ່ນ້ອຍ).

ໄດ້ລົງຕິດຕາມ ກວດກາ ແລະ ແນະນຳການຕິດ ລາຄາສິນຄ້າເປັນເງິນກີບ, ສິນຄ້າໝົດອາຍຸ ເສື່ອມຄຸນນະພາບ ສິນຄ້າລອກຮຽນແບບ ແລະ ສິນຄ້າບໍ່ໄດ້ເສຍພາສີອາກອນ ຕາມຕະຫລາດຫ້າງຮ້ານຕ່າງໆ ຢ່າງເປັນປົກກະຕິ ເພື່ອປ້ອງກັນການຖືກເອົາລັດເອົາປຽບ ທັງເປັນການປົກປ້ອງຜູ້ບໍລິໂພກຢ່າງເປັນປົກກະຕິ.

ນອກນັ້ນຍັງມີຕະຫຼາດຂາຍຜັກປອດສານເຄມີ(ຜັກພືດກະສິກຳອິນຊີ)ຢູ່ໃນ3 ເມືອງ(ເມືອງແປກ, ເມືອງຄູນ ແລະ ເມືອງຜາໄຊ)ຂາຍທຸກໆວັນຈັນ, ວັນພຸດ ແລະ ວັນ ເສົາຂອງແຕ່ລະອາທິດ. ຈາກນີ້ຍັງມີສິນຄ້າອີກຊະນິດໜຶ່ງທີ່ຕ້ອງໄດ້ຮັບການຄວບຄຸມຢ່າງເຄັ່ງຄັດນັ້ນກໍ່ຄືນ້ຳມັນ ຊຶ່ງທົ່ວແຂວງມີ 3 ສາງນ້ຳມັນ ມີ 190 ປ້ຳ.

 

ທ່ານຄຳປາວ ມົວ ຮອງເຈົ້າແຂວງຊຽງຂວາງກ່າວວ່າ ຕ້ອງຄວບຄຸມລາຄາສິນຄ້າ ແລະ ຄ່າບໍລິການ ໃຫ້ເຂັ້ມງວດ ເພື່ອກຽມຮັບງານມະຫາກຳກິລາແຫ່ງຊາດຄັ້ງທີ 11 ທີ່ແຂວງຊຽງຂວາງເປັນເຈົ້າພາບ ໃນວັນທີ 11 ເດືອນພະຈິກ ຈະເປັນມື້ເປີດງານ ຈະເລີ່ມແຂ່ງຂັນໃນວັນທີ7ພະຈິກ ລາຄາສິນຄ້າ-ຄ່າບໍລິການຕ້ອງໃຫ້ຢູ່ໃນເກນປົກກະຕິ

ກອງປະຊຸມດັ່ງກ່າວຈັດຂຶ້ນທີ່ພະແນກອຸດສາຫະກຳ ແລະ ການຄ້າແຂວງ ໂດຍການເປັນປະທານຂອງທ່ານ ຄຳປາວ ມົວ ຮອງເຈົ້າແຂວງໆຊຽງຂວາງ, ມີບັນດາຫົວໜ້າ, ຮອງຫົວໜ້າພະແນກການເຂົ້າຮ່ວມ.

ຂ່າວ: ບຸນມີ ແສງທຸມມີ

LEAVE A REPLY

Please enter your comment!
Please enter your name here