ທຳຄວາມເຂົ້າໃຈການໃຫ້ອະໄພຍະໂທດ

0
105

ໃນແຕ່ລະປີລັດຈະມີນະໂຍບາຍຫຼຸດຜ່ອນໂທດ ແລະອະໄພຍະໂທດແກ່ນັກໂທດຜູ້ທີ່ປະຕິບັດຕົວດີ ເພື່ອເປີດໂອກາດໃຫ້ມາໃຊ້ຊີວິດຄືຄົນປົກກະຕິສ້າງສາເສດຖະກິດຄອບຄົວຕໍ່ໄປ ແຕ່ຫຼາຍໆຄົນອາດຍັງບໍ່ຮູ້ ນະໂຍບາຍທີ່ວ່ານີ້ປະຕິບັດເພື່ອຫຍັງ ດັ່ງນັ້ນແຂວງໄຊຍະບູລີຈິ່ງຈັດໃຫ້ມີວາລະເຊື່ອມຊືມກ່ຽວກັບວຽກງານດັ່ງກ່າວ.

ການໃຫ້ອະໄພຍະໂທດດັ່ງກ່າວຈຸດປະສົງກໍ່ເພື່ອກໍານົດຫຼັກການ, ລະບຽບການ ແລະ ມາດຕະການ ກ່ຽວກັບການຈັດຕັ້ງ ແລະ ການເຄື່ອນໄຫວວຽກງານໃຫ້ອະໄພຍະໂທດມີປະສິດທິພາບ, ຮັບປະກັບນະໂຍບາຍມະນຸດສະທໍາ, ເພື່ອສຶກສາອົບຮົມນັກໂທດ ໃຫ້ເຫັນໄດ້ແນວທາງນະໂຍບາຍອັນຖືກຕ້ອງເປັນທໍາຂອງລັດ ແຫ່ງ ສປປ ລາວ ກໍ່ສ້າງຕົນເອງໃຫ້ກາຍເປັນພົນລະເມືອງດີຂອງຊາດ ທັງເຮັດໃຫ້ສັງຄົມມີຄວາມສະຫງົບ ເປັນລະບຽບຮຽບຮ້ອຍ, ສ້າງເງື່ອນໄຂໃຫ້ມີການປະກອບສ່ວນເຂົ້າໃນການປົກປັກຮັກສາ ແລະ ພັດທະນາປະເທດຊາດ.

ກອງປະຊຸມເຊື່ອມຊືມວຽກງານອະໄພຍະໂທດໄດ້ຈັດຂຶ້ນໃນຕອນເຊົ້າວັນທີ 4 ພຶດສະພາ 2018 ນີ້, ຢູ່ທີ່ສະໂມສອນຫ້ອງວ່າການແຂວງໄຊຍະບູລີ ໂດຍການໃຫ້ກຽດເປັນປະທານຂອງທ່ານ ຍັນຍົງ ສີປະເສິດ ຮອງເຈົ້າແຂວງ ປະທານອະໄພຍະໂທດແຂວງໄຊຍະບູລີ, ມີຄະນະກໍາມະການອະໄພຍະໂທດ, ພະແນກການທີ່ກ່ຽວຂ້ອງ, ພ້ອມດ້ວຍພະນັກງານໄອຍະການເຂົ້າຮ່ວມ.

ທ່ານ ພຸດທະວົງ ພັນທະລາດ ຮອງຫົວໜ້າອົງການໄອຍະການປະຊາຊົນແຂວງ ຫົວໜ້າກອງເລຂາຊ່ວຍວຽກຂອງຄະນະກໍາມະການອະໄພຍະໂທດແຂວງ ໄດ້ຂື້ນຜ່ານຂໍ້ຕົກລົງຂອງທ່ານເຈົ້າແຂວງ ວ່າດ້ວຍການແຕ່ງຕັ້ງຄະນະກໍາມະການອະໄພຍະໂທດ ແຂວງໄຊຍະບູລີ ເລກທີ 380/ຈຂ.ຊຍ ລົງວັນທີ 27 ເມສາ 2018 ແລະ ຂໍ້ຕົກລົງປະທານຄະນະກໍາມະການອະໄພຍະໂທດແຂວງໄຊຍະບູລີ ວ່າດ້ວຍການແຕ່ງຕັ້ງກອງເລຂາ ຊ່ວຍວຽກຂອງຄະນະກໍາມະການອະໄພຍະໂທດ ແຂວງໄຊຍະບູລີ ເລກທີ 392/ຈຂ.ຊຍ ລົງວັນທີ 4 ພຶດສະພາ 2018. ເພື່ອຄົ້ນຄວ້າ, ກວດກາຂື້ນບັນຊີນັກໂທດຜູ້ທີ່ໄດ້ມາດຖານເງື່ອນໄຂໃຫ້ຖືກຕ້ອງ ຕາມລັດຖະບັນຍັດຂອງປະທານປະເທດ ວ່າດ້ວຍການໃຫ້ອະໄພຍະໂທດ.

 

ພົວພັນ ແລະ ປະສານສົມທົບກັບພະແນກການກ່ຽວຂ້ອງເພື່ອເກັບກໍາຂໍ້ມູນປະກອບເອກະສານຢັ້ງຢືນຄວາມຖືກຕ້ອງ, ຄົວຖ້ວນ, ຊັດເຈນ ແລະ ຍຸຕິທໍາ. ຈາກນັ້ນຜູ້ເຂົ້າຮ່ວມກໍ່ໄດ້ເຊື່ອມຊືມລັດຖະບັນຍັດສະບັບເລກທີ 001/ ປປທ ລົງວັນທີ 20 ເມສາ 2018 ວ່າດ້ວຍການໃຫ້ອະໄພຍະໂທດ ແລະ ນິຕິກໍາກ່ຽວກັບການອະໄພຍະໂທດຈໍານວນໜື່ງ.

ສາຄອນ ໄຊສົມຮັກສາ

LEAVE A REPLY

Please enter your comment!
Please enter your name here