ເຕືອນ!ຜູ້ໃຊ້ສື່ອອນລາຍ ປະຈຸບັນມີຄົນແຮັກຂໍ້ມູນໄປຮຽກຄ່າໄຖ່ຂໍໃຫ້ທຸກຄົນລະວັງ

0
422


ໃນຍຸກນີ້ເປັນຍຸກຂອງໂລກາພິວັດ ຍຸກແຫ່ງການແຂ່ງຂັນ, ຊ່ວງຊີງ ຊຶ່ງມີທັງອັນດີ ແລະບໍ່ດີແອບແຝມານຳ ໂດຍສະເພາະການນຳໃຊ້ສື່ສັງຄົມອອນລາຍ ຂໍໃຫ້ຜູ້ໃຊ້ທຸກທ່ານຈົ່ງມີສະຕິ ແລະສຶກສາລະບົບການລັອກປ້ອງກັນໄວ້ອີກທາງໜຶ່ງ ເນື່ອງຈາກປະຈຸບັນກຳລັງມີຄົນບໍ່ດີຈຳນວນໜຶ່ງພະຍາຍາມລັກເອົາຮູບພາບ, ຂໍ້ມູນຕ່າງໆຂອງບຸກຄົນໄປຕັດຕໍ່ເພື່ອຮຽກຄ່າໄຖ່ ເຫດການເກີດຂຶ້ນແລ້ວຢູ່ແຂວງອັດຕະປື.


ອີງຕາມຂໍ້ມູນຈາກ ພະແນກໄປສະນີ, ໂທລະຄົມມະນາຄົມ ແລະ ການສື່ສານ ແຂວງອັດຕະປື ໄດ້ອອກແຈ້ງການ ເລກທີ 76/ປທສ ລົງວັນທີ 4 ກຸມພາ 2019 ເຖິງ ບັນດາພໍ່ແມ່ປະຊາຊົນ, ພະນັກງານ, ທະຫານ-ຕຳຫຼວດທຸກພາກສ່ວນ ເລື່ອງ ການແຮັກຂໍ້ມູນໃນມືຖື ນຳເອົາຂໍ້ມູນສ່ວນຕົວມາຮຽກຄ່າໄຖ່.
ໂດຍອີງຕາມກົດໝາຍວ່າດ້ວຍການຕ້ານ ແລະ ສະກັດກັ້ນອາຊະຍາກຳທາງລະບົບຄອມພິວເຕີ ສະບັບເລກທີ 61/ສພຂ ລົງວັນທີ 15 ກໍລະກົດ 2015 ແລະ ອີງຕາມໜັງສືຄຳຮ້ອງ ຂໍແຈ້ງເຫດຂົ່ມຂູ່ທາງສື່ສັງຄົມອອນລາຍ ຄັ້ງວັນທີ 1 ກຸມພາ 2019.


ດັ່ງນັ້ນ, ພະແນກໄປສະນີ, ໂທລະຄົມມະນາຄົມ ແລະ ການສື່ສານແຂວງ ແຈ້ງມາຍັງທຸກພາກສ່ວນໃນສັງຄົມໄດ້ຮັບຊາບຄື: ໃນວັນທີ 1 ກຸມພາ 2019 ໄດ້ຮັບແຈ້ງເຫດ ຈາກປະຊາຊົນໃນແຂວງອັດຕະປືພວກເຮົາ ຖືແຮັກຂໍ້ມູນໃນມືຖື ແລະ ຖືກນຳເອົາຂໍ້ມູນຮູບພາບສ່ວນຕົວໄປຕັດຕໍ່ດັດແປງ ສ້າງວິດີໂອລາມົກອານາຈານ ແລ້ວສົ່ງມາຂົ່ມຂູ່ເອົາເງິນຈຳນວນ 2.000 ໂດລາສະຫາລັດ, ຖ້າຜູ້ເສຍຫາຍບໍ່ຍອມໂອນເງິນໃຫ້ ແມ່ນຈະເອົາວິດີໂອດັ່ງກ່າວເຜີຍແຜ່ລົງໃນສື່ສັງຄົມອອນລາຍ.
ເຊິ່ງຜູ້ທີ່ແຮັກຂໍ້ມູນ ໃຊ້ຊື່ໃນເຟສບຸກ (Facebook) ວ່າ Jaysha Garde ລະບຸທີ່ຢູ່ປະເທດ ຟີລິບປິນ Philippines ມີຊື່ລາຍ (Line) ແມ່ນ Kittyprincess ແລະ ລະບຸຊື່ຜູ້ຮັບເງິນໂອນປາຍທາງ Maria ELENA BORJA ທີ່ຢູ່ Lagro Quezon City Manila Philippines.


ດັ່ງນັ້ນ, ຂໍໃຫ້ທ່ານຜູ້ໃຊ້ເຟສບຸກ (Facebook) ຄົ້ນຫາຊື່ Jaysha Garde ແລ້ວຊ່ວຍບ໋ອກ ເພາະວ່າບຸກຄົນດັ່ງກ່າວເປັນນັກໂຈລະກຳຂໍ້ມູນທີ່ອັນຕະລາຍ (ວິທີການບ໋ອກໃຫ້ຄົ້ນເບິ່ງໃນ Youtube) ພ້ອມດຽວກໍ່ໃຫ້ກະຈາຍຂ່າວນີ້ໃຫ້ໝູ່ເພື່ອນ ແລະ ຄົນໃກ້ຕົວຂອງທ່ານຮັບຊາບ.


ຖ້າມີຜູ້ໃຊ້ Messenger ມີຊື່ວ່າ Jaysha Garde ຫຼື ບຸກຄົນທີ່ບໍ່ຮູ້ຈັກແຊັດ, ສົ່ງຂໍ້ມູນ, ຮູບພາບ ມາຫາຂໍໃຫ້ທ່ານຢ່າເຂົ້າໄປເບິ່ງ ຫຼື ຕອບກັບເດັດຂາດ ເພາະວ່າເວລາຕອບກັບ ກໍ່ໝາຍຄວາມວ່າທ່ານໄດ້ອະນຸຍາດບຸກຄົນນັ້ນ ສາມາດເຂົ້າເຖິງຂໍ້ມູນໃນບັນຊີ Facebook ຂອງທ່ານບາງສ່ວນ. ໃນກໍລະນີມີຄົນສົ່ງ, ໂພສວິດີໂອ-ຮູບພາບລາມົກອານາຈານ, ພາບຄວາມຮຸນແຮງ, ຫົດຫູ່, ພາບຕັດຕໍ່ໂດຍບໍ່ໄດ້ຮັບອະນຸຍາດຫ້າມໂພສ ຫຼື ແຊຕໍ່ເດັດຂາດ ບໍ່ວ່າຈະເປັນທາງ Facebook, Line, WhatApps, Wechat Messenger ແລະ App ອື່ນໆ.


ຖ້າທ່ານແຊຕໍ່ ຫຼື ໂພສລົງໃນສື່ສັງຄົມອອນລາຍ ແມ່ນຈະເປັນການລະເມີດກົດໝາຍວ່າດ້ວຍການຕ້ານ ແລະ ສະກັດກັ້ນອາຊະຍາກຳທາງລະບົບຄອມພິວເຕີ, ສະບັບເລກທີ 61/ສພຊ, ລົງວັນທີ 15 ກໍລະກົດ 2015, ໃນມາດຕາ 11,12,13,14 ແລະ ມາດຕາ 16 ແລະ ຈະຖືກລົງໂທດຕັດອິດສະຫຼະພາບແຕ່ 3 ເດືອນ ຫາ 5 ປີ ແລະ ຈະຖືກປັບໃໝແຕ່ 3.000.000 ກີບ ຫາ 50.000.000 ກີບ ແລະ ອາດຜິດກົດໝາຍອື່ນໆຂອງ ສປປ ລາວນໍາອີກ.


ສະນັ້ນ, ຂໍໃຫ້ທຸກທ່ານທີ່ນຳໃຊ້ສື່ສັງຄົມອອນລາຍ ມີສະຕິລະວັງຕົວໃຫ້ຫຼາຍຂຶ້ນ ເພາະປັດຈຸບັນນີ້, ມີພວກນັກຕົ້ມຕຸ໋ນ, ນັກໂຈລະກຳຂໍ້ມູນ ແລະ ພວກແອບແຝງຕ່າງໆ ຈະໃຊ້ສ່ອງທາງນີ້ ເພື່ອຫາຜົນປະໂຫຍດສ່ວນຕົວ. ດັ່ງນັ້ນ, ເພື່ອປົກປ້ອງກັນຂັ້ນຕົ້ນ ຂໍໃຫ້ປະຕິບັດດັ່ງນີ້:
ບໍ່ຄວນໂພສຮູບການເຄື່ອນໄຫວ ທີ່ເປັນລັກສະນະ ໂຊໜ້າທີ່, ຕໍາແໜ່ງ ແລະ ສະຖານະ ເພາະຜູ້ທີ່ມີຖານະດີ ຈະຕົກເປັນເປົ້າໝາຍໃນການຕິດຕາມຂອງພວກພວກນີ້.

LEAVE A REPLY

Please enter your comment!
Please enter your name here