ໂລກກຳລັງຄືບຄານສູ່ສົງຄາມເຢັນຮອບໃຫມ່ !ຣັດ​ເຊຍ​ປະ​ກາດ​​ຢຸດ​ຕິ​ການ​ປະ​ຕິ​ບັດ​ພັນ​ທະ​ທີ່​ລະ​ບຸ​ໄວ້​ໃນ“ສົນ​ທິ​ສັນ​ຍາ​ວ່າ​ດ້ວຍ​ຂີ​ປະ​ນາ​ວຸດ​ນິວ​ເຄຼຍ​ໄລ​ຍະ​ກາງ”

0
285

ຕາມຂ່າວຈາກຊີອາໄອ, ວັນ​ທີ 2 ກຸມ​ພານີ້, ທ່ານ​ວາ​ລະ​ດີ​ເມຍ ປູ​ຕີນ ປະ​ທາ​ນາ​ທິ​ບໍ​ດີ​ຣັດ​ເຊຍ​ປະ​ກາດ​ວ່າ: ຣັດ​ເຊຍ​ຈະ​ຢຸດ​ຕິ​ການ​ປະຕິບັດພັນທະທີ່ລະບຸໄວ້ໃນ“ສົນທິສັນຍາວ່າດ້ວຍຂີປະນາວຸດນິວເຄຼຍໄລຍະກາງ”ເປັນການຊົ່ວຄາວ.

ໃນ​ເວ​ລາ​ໂອ້​ລົມ​ກັບ​ທ່ານ​ເຊີ​ເກ ລັ​ຟ​ຣົ​ຟ ລັດ​ຖະ​ມົນ​ຕີ​ກະ​ຊວງ​ການ​ຕ່າງ​ປະ​ເທດ ແລະ​ທ່ານ​ເຊີ​ເກ ໂຊຍ​ກູ ລັດ​ຖະ​ມົນ​ຕີ​ກະ​ຊວງ​ປ້ອງ​ກັນ​ປະ​ເທດ​ຣັດ​ເຊຍ, ທ່ານ​ປູ​ຕີນ​ກ່າວ​ວ່າ:“ການ​ຕອບໂຕ້​ຂອງ​ພວກ​ເຮົາແມ່ນ​ແນ​ໃສ່ອາ​ເມ​ລິ​ກາ​ທີ່ປະ​ກາດຈະ​ຢຸດ​ຕິການ​ປະ​ຕິ​ບັດ​ພັນ​ທະ​ໃນ​ສົນ​ທິ​ສັນ​ຍາເປັນ​ການ​ຊົ່ວ​ຄາວ, ພວກ​ເຮົາ​ກໍ​ຈຳ​ເປັນ​ຕ້ອງ​ໄດ້ຢຸດ​ຕິ​ເປັນ​ການ​ຊົ່ວ​ຄາວ​ເຊັ່ນກັນ.”

ທ່ານ​ປູ​ຕີນ​ກ່າວຕື່ມ​ວ່າ: ພາຍ​ຫຼັງໄດ້​ຢຸດ​ຕິ​ການ​ປະ​ຕິ​ບັດ​ພັນ​ທະ​ໃນ“ສົນ​ທິ​ສັນ​ຍາ​ວ່າ​ດ້ວຍ​ຂີ​ປະ​ນາ​ວຸດ​ນິວ​ເຄຼຍ​ໄລ​ຍະ​ກາງ”ເປັນ​ການ​ຊົ່ວ​ຄາວ​ແລ້ວ, ຣັດ​ເຊຍ​ຈະ​ຄົ້ນ​ຄວ້າ​ຜະ​ລິດ​ອາ​ວຸດ​ໃໝ່, ແຕ່ບໍ່​ເພີ່ມ​ງົບ​ປະ​ມານ​ດ້ານ​ການ​ປ້ອງ​ກັນ​ປະ​ເທດ. ພວກ​ເຮົາ​ບໍ່​ຄວນ​ແລະ​ຈະ​ບໍ່ຕົກ​ຢູ່​ໃນ​ສະ​ພາບ​ຂອງການ​ຊ່ວງ​ເສັງ​ປະ​ກອບອາ​ວຸດ​ທີ່​​ຈະ​ສິ້ນເປືອງ​ງົບ​ປະ​ມານ​ຂອງ​ພວກ​ເຮົາ​ເອງ​ເປັນ​ຈຳ​ນວນ​ມະ​ຫາ​ສານ.”

 ທ່ານ​ປູ​ຕີນ​ຍັງ​ຮຽກ​ຮ້ອງວ່າ: ຈະ​ບໍ່​ຈັດ​ການ​ເຈ​ລະ​ຈາ​ສາ​ກົນຮອບ​ໃໝ່​ອີກກ່ຽວ​ກັບ​ຂໍ້​ສະ​ເໜີທີ່​ກ່ຽວ​ຂ້ອງ​ຂອງ​ສົນ​ທິ​ສັນ​ຍາ​ດັ່ງ​ກ່າວ ແລະກ່ອນທີ່​ອາ​ເມ​ລິ​ກາ​ຈະ​ຕິດ​ຕັ້ງ​ຂີ​ປະ​ນາ​ວຸດ​ໄລ​ຍະ​ກາງ​ແລະ​ໄລ​ຍະ​ສັ້ນ​ຢູ່​ແຫ່ງ​ຕ່າງໆ​ຂອງ​ໂລກ, ຣັດ​ເຊຍ​ຈະ​ບໍ່​ຕິດ​ຕັ້ງ​ຂີ​ປະ​ນາ​ວຸດ​ທີ່​ຄ້າຍ​ກັນ​ຢູ່​ແຫ່ງ​ຕ່າງໆ.

ວັນ​ທີ 1 ກຸມ​ພານີ້, ກະ​ຊວງ​ການ​ຕ່າງ​ປະ​ເທດ​ອາ​ເມ​ລິ​ກາ​ປະ​ກາດ​ວ່າ: ອາ​ເມ​ລິ​ກາ​ຈະ​ຢຸດ​ຕິ​ການ​ປະ​ຕິ​ບັດ​ພັນ​ທະ​ທີ່​ລະ​ບຸ​ໄວ້​ໃນ“ສົນ​ທິ​ສັນ​ຍາ​ວ່າ​ດ້ວຍ​ຂີ​ປະ​ນາ​ວຸດ​ນິວ​ເຄຼຍ​ໄລ​ຍະ​ກາງ”ເປັນ​ການ​ຊົ່ວ​ຄາວ​ເລີ່ມ​ແຕ່​ວັນ​ທີ 2 ກຸມ​ພານີ້​ເປັນ​ຕົ້ນ​ໄປ, ແລະຈະ​ເລີ່ມ​ດຳ​ເນີ​ນ​ງານ​ການຖອນ​ຕົວ​ອອກ​ຈາກ​ສົນ​ທິ​ສັນ​ຍາ​ດັ່​ງ​ກ່າວ.

ກ່ອນຫນ້ານີ້ ວັນ​ທີ 1 ກຸມ​ພານີ້, ກະ​ຊວງ​ການ​ຕ່າງ​ປະ​ເທດ​ຣັດ​ເຊຍ​ກ່າວ​ວ່າ: ຣັດ​ເຊຍຈະ​ສືບ​ຕໍ່​ເດັດດ່ຽວ​ຄັດ​ຄ້ານການ​ກະ​ທຳ​ທີ່​ມີ​ລັກ​ສະ​ນະ​ທຳ​ລາຍ​ຂອງ​ອາ​ເມ​ລິ​ກາ​ໃນ​ຂົງ​ເຂດ​ການ​ຄວບ​ຄຸມ​ກຳ​ລັງ​ຮົບ ການ​ຫຼຸດ​ອາ​ວຸດ ແລະ​ການບໍ່​ແຜ່​ຜາຍ​ອາ​ວຸດ.

ມື້​ດຽວ​ກັນ, ກະ​ຊວງ​ການ​ຕ່າງ​ປະ​ເທດ​ຣັດ​ເຊຍ​ອອກ​ຖະ​ແຫຼງ​ການ​ວ່າ: ການ​ກະ​ທຳ​ຕ່າງໆຂອງອາ​ເມ​ລິ​ກາເຊັ່ນ ​ການ​ຖອນ​ຕົວ​ອອກ​ຈາກ“ສົນ​ທິ​ສັນ​ຍາ​ວ່າ​ດ້ວຍ​ລະ​ບົບ​ຕໍ່ຕ້ານ​ຂີ​ປະ​ນາ​ວຸດ”ຫຼື ABM, ກີດ​ຂວາງປະ​ຊາ​ຄົມ​ໂລກປັບ​ປຸງ“ສົນ​ທິ​ສັນ​ຍາ​ວ່າ​ດ້ວຍ​ການ​ປອດ​ອາ​ວຸດ​ຊີ​ວະ​ພາບ”ຫຼື BWC, ຖອນ​ຕົວ​ອອກ​ຈາກ​ສັນ​ຍາ​ຮອບ​ດ້ານ​ກ່ຽວ​ກັບ​ບັນ​ຫາ​ນິວ​ເຄຼຍ​ອີ​ຣານ ແລະ​ອື່ນໆ ​ໄດ້​ເຮັດ​ໃຫ້​ຣັດ​ເຊຍມີ​ຄວາມກັງ​ວົນ, ຣັດ​ເຊຍ​ຈະ​ສືບ​ຕໍ່ເດັດດ່ຽວ​ຄັດ​ຄ້ານການ​ກະ​ທຳ​ທີ່​ມີ​ລັກ​ສະ​ນະ​ທຳ​ລາຍ​ຂອງ​ອາ​ເມ​ລິ​ກາ​ໃນ​ຂົງ​ເຂດ​ການ​ຄວບ​ຄຸມ​ກຳ​ລັງ​ຮົບ ການ​ຫຼຸດ​ອາ​ວຸດ ແລະ​ການບໍ່​ແຜ່​ຜາຍ​ອາ​ວຸດ.

ວັນ​ທີ 1 ກຸມ​ພານີ້, ກະ​ຊວງ​ການ​ຕ່າງ​ປະ​ເທດອາ​ເມ​ລິ​ກາ​ປະ​ກາດ​ວ່າ: ອາ​ເມ​ລິ​ກາ​ຈະ​ຢຸດ​ຕິ​ການ​ປະ​ຕິ​ບັດ​ພັນ​ທະ​ທີ່​ລະ​ບຸ​ໄວ້​ໃນ“ສົນ​ທິ​ສັນ​ຍາ​ວ່າ​ດ້ວຍ​ຂີ​ປະ​ນາ​ວຸດໄລ​ຍະ​ກາງ​”ຫຼື INF ເປັນ​ການ​ຊົ່ວ​ຄາວແຕ່​ວັນ​ທີ 2 ກຸມ​ພານີ້​ເປັນ​ຕົ້ນ​ໄປ, ແລະຈະ​ເລີ່ມ​ດຳ​ເນີນ​ວຽກ​ງານ​ຖອນ​ຕົວ​ອອກ​ຈາກ​ສົນ​ທິ​ສັນ​ຍາ​ດັ່ງ​ກ່າວ. ທ່ານ​ໄມ ພົມ​ເພວ ລັດ​ຖະ​ມົນ​ຕີ​ກະ​ຊວງ​ການ​ຕ່າງ​ປະ​ເທດ​ອາ​ເມ​ລິ​ກາ​ກ່າວ​ວ່າ: ເນື່ອງ​ຈາກຣັດ​ເຊຍ​ໄດ້​ລະ​ເມີດ​ຂໍ້​ກຳ​ນົດ​ໃນສົນ​ທິ​ສັນ​ຍາກຳ​ລັງ​ຮົບ​ດ້ານ​ນິວ​ເຄຼຍ​ໄລ​ຍະ​ກາງ​ຫຼື ​INF ເປັນ​ເວ​ລາ​ດົນ​ນານແລ້ວ, ສະ​ນັ້ນ, ອາ​ເມ​ລິ​ກາ​ຈະຢຸດ​ຕິ​ການ​ປະ​ຕິ​ບັດ​ພັນ​ທະ​ໃນ​ສົນ​ທິ​ສັນ​ຍາ​ດັ່​ງ​ກ່າວ​ເປັນການ​ຊົ່ວ​ຄາວ ແລະ​ຈະ​ເລີ່ມ​ດຳ​ເນີນ​ວຽກ​ງານ​ຖອນ​ຕົວ​ອອກ​ຈາກ​ສົນ​ທິ​ສັນ​ຍາ​ດັ່ງ​ກ່າວ​ເປັນ​ເວ​ລາ 6 ເດືອນ.

LEAVE A REPLY

Please enter your comment!
Please enter your name here