ນາຍົກລັດຖະມົນຕີ ຊີ້ນໍາໃຫ້ບັນດາສະມາຊິກລັດ ຖະບານ ເອົາໃຈໃສ່ເປັນພິເສດໃນການກະກຽມ ແລະ ຈັດຕັ້ງປະຕິບັດບັນດາວຽກງານຈຸດສຸມຂອງລັດຖະບານ ໃນປີ 2019

0
307

ກອງປະຊຸມລັດຖະບານສະໄໝສາມັນ ປະຈໍາເດືອນ ມັງກອນ 2019 ໄດ້ດໍາເນີນເປັນເວລາມື້ເຄິ່ງ ຄືວັນທີ 24-25 ມັງກອນ 2019 ທີ່ສໍານັກງານນາຍົກລັດຖະມົນຕີ, ພາຍໃຕ້ການເປັນປະທານຂອງ ທ່ານ ທອງລຸນ ສີສຸລິດ ນາຍົກ ລັດຖະມົນຕີ, ມີບັນດາທ່ານຮອງນາຍົກລັດຖະມົນຕີ ແລະ ບັນດາສະມາຊິກລັດຖະບານ ເຂົ້າຮ່ວມຢ່າງພ້ອມພຽງ.

ໃນຕອນທ້າຍຂອງກອງປະຊຸມ, ທ່ານ ທອງລຸນ ສີສຸລິດ ນາຍົກລັດຖະມົນຕີ ໄດ້ຊີ້ນໍາໃຫ້ບັນດາສະມາຊິກລັດ ຖະບານ ເອົາໃຈໃສ່ເປັນພິເສດໃນການກະກຽມ ແລະ ຈັດຕັ້ງປະຕິບັດບັນດາວຽກງານຈຸດສຸມຂອງລັດຖະບານ ໃນປີ 2019

ສະເພາະຂົງເຂດເສດຖະກິດ ຈະສຸມໃສ່ 5 ວຽກໃຫຍ່ ດັ່ງນີ້:1. ຈັດຕັ້ງປະຕິບັດມະຕິ 057 ຂອງຄະນະບໍລິຫານງານສູນກາງພັກ ໃນນີ້ ສຸມໃສ່ຈັດຕັ້ງປະຕິບັດ 8 ມາດຕະການຊຸກຍູ້ເສດຖະກິດ;2.ປັບປຸງລັດວິສາຫະກິດ ໃຫ້ເປັນຮູບປະທໍາ;3.ປະຕິບັດຄໍາສັ່ງ ເລກທີ 02/ນຍ ວ່າດ້ວຍການປັບປຸງບັນດາລະບຽບການ ແລະ ກົນໄກປະສານງານ ໃນການດໍາເນີນທຸລະກິດຢູ່ ສປປ ລາວ;4.ປັບປຸງການສົ່ງເສີມ ແລະ ຄຸ້ມຄອງການລົງທຶນຜ່ານປະຕູດຽວ (ຄລທສ-ຄລທຂ);5.ສົ່ງເສີມການທ່ອງທ່ຽວ ແລະ ປີທ່ອງທ່ຽວ ລາວ-ຈີນ 2019 ໃຫ້ມີປະສິດທິຜົນສູງ.

ຂົງເຂດວັດທະນະທໍາ-ສັງຄົມ ຈະສຸມໃສ່ 5 ວຽກໃຫຍ່ຄື:1.ສຶກສາອົບຮົມວຽກງານການເມືອງແນວຄິດ ແລະ ແກ້ໄຂປະກົດການຫຍໍ້ທໍ້ຕ່າງໆໃນສັງຄົມ ແລະ ພັດທະນາການສຶກສາໃຫ້ມີຄຸນນະພາບ ແລະ ກວ້າງຂວາງໄປສູ່ປະຊາຊົນ ເຂດຫ່າງໄກສອກເຫຼີກທຸລະການດານ;2.ຍົກລະດັບ ແລະ ຄຸນນະພາບ ຂອງການບໍລິການດ້ານສາທາລະນະສຸກ ເປັນຕົ້ນແມ່ນແຜນຍົກສູງຄຸນນະພາບ ໃນການບໍການຂອງໂຮງໝໍ ແລະ ສຸກສາລາ;3.ພັດທະນາ ແລະ ຍົກຄຸນນະພາບ ຂອງສີມືແຮງງານພາຍໃນ ໃຫ້ພັດທະນາດີຂຶ້ນ ແລະ ສາມາດຕອບສະໜອງແຮງງານ ໃຫ້ພຽງພໍ ແລະ ຄຸ້ມຄອງແຮງງານຕ່າງປະເທດໃຫ້ເຂົ້າສູ່ລະບຽບການ;

4.ພັດທະນາຊົນນະບົດ ແລະ ລືບລ້າງຄວາມທຸກຍາກ (ຕິດພັນກັບການປຸກລະ ດົມຂະບວນການຮັກຊາດ ແລະ ພັດທະນາ) ສະເໜີໃຫ້ກະຊວງພາຍໃນ ສົມທົບກັບຄະນະແຂ່ງຂັນຍ້ອງຍໍລະດັບຊາດ ປຶກສາຫາລືກັນ, ຈະສ້າງຂະບວນການແນວໃດ ເພື່ອປຸກລະດົມທົ່ວສັງຄົມ, ພາກທຸລະກິດເຂົ້າຮ່ວມ ເພື່ອຊ່ວຍປະຊາຊົນທີ່ໄດ້ຮັບຜົນກະທົບ;

5. ຊ່ວຍເຫຼືອປະຊາຊົນ ແລະ ຟື້ນຟູເຂດ ທີ່ຖືກກະທົບຈາກໄພພິບັດ ຕ້ອງໄດ້ເອົາໃຈໃສ່ເປັນພິເສດ ພ້ອມທັງຟື້ນຟູຊີວິດການເປັນຢູ່ຂອງປະຊາຊົນເມືອງສະໜາມໄຊ ໃຫ້ມີຄວາມຄືບໜ້າ ແລະ ທັນການ. ສໍາລັບປະຊາຊົນທີ່ຍັງຢູ່ໃນເຕັ້ນ ແມ່ນໃຫ້ຮີບຮ້ອນສ້າງເຮືອນໃໝ່ສໍາເລັດໂດຍໄວ ເພື່ອໃຫ້ເຂົາເຈົ້າຍ້າຍໄປຢູ່ເຮືອນໃໝ່

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ

LEAVE A REPLY

Please enter your comment!
Please enter your name here