ຫຼວງພະບາງຝຶກຊ້ອມໃຫຍ່ກະກຽມງານສະຫຼອງວັນສ້າງຕັ້ງກອງທັບຄົບຮອບ 70 ປີ

0
546

ໃນຕອນເຊົ້າຂອງວັນທີ 19 ມັງກອນ 2019, ທີ່ເດີ່ນກິລາຂອງແຂວງ ບ້ານນາຫຼວງ, ນະຄອນ ຫຼວງພະບາງ, ກອງບັນຊາ ການທະຫານແຂວງຫຼວງພະບາງ ໄດ້ຈັດການຝຶກຊ້ອມໃຫຍ່ ພິທີສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ວັນທີ 20 ມັງກອນ ຄົບຮອບ 70 ປີ ດ້ວຍບັນຍາກາດອັນຟົດຟື້ນ, ໂດຍມີ ທ່ານ ຄຳຂັນ ຈັນທະວີສຸກ, ເຈົ້າແຂວງຫຼວງພະບາງ, ປະທານຄະນະປ້ອງກັນຊາດ ປ້ອງກັນຄວາມສະຫງົບແຂວງ ພ້ອມດ້ວຍບັນດານາຍ ແລະ ພົນທະຫານ ພາຍໃນກອງບັນຊາການທະຫານແຂວງ ແລະ ແຂກຮັບເຊີນຈາກພາກສ່ວນຕ່າງໆ ເຂົ້າຮ່ວມ.


ພິທີໄດ້ເລີ່ມຕົ້ນຂຶ້ນດ້ວຍ ການເຄົາລົບທຸງຊາດ, ແລະ ສະເໜີຄະນະຜູ້ແທນເຂົ້າຮ່ວມ; ຈາກນັ້ນ ໄດ້ມີການກວດແຖວກ້ອນກຳລັງສວນສະໜາມ ແລະ ດຳເນີນການເດີນສວນສະໜາມ, ໂດຍມີທັງໝົດ 15 ກ້ອນ, ເລີ່ມຕົ້ນດ້ວຍ ກ້ອນກາ ຫມາຍ 70 ປີ, ກ້ອນທຸງໄຊ, ກ້ອນນາຍທະຫານສຳນັກງານ-ອົງການ, ກ້ອນນາຍທະຫານຮາບ (ນາຍສິບ), ກ້ອນເຫຼົ່າຮົບສືບຂ່າວ-ຕີພິເສດ, ກ້ອນກອງຫຼອນປ້ອງກັນຕົວ, ກ້ອນເສນາຮັກ, ກ້ອນກຳລັງປ້ອງກັນຄວາມສະຫງົບ, ກ້ອນນັກຮົບເກົ່າ, ກ້ອນກອງດູລິຍາງຂອງເຍົາວະຊົນ, ກຳລັງເຍົາວະຊົນ, ຊາວໜຸ່ມ, ຊາວໜຸ່ມນັກຮຽນ-ນັກສຶກສາ, ກ້ອນສະຫະພັນແມ່ຍີງ-ກຳມະບານ, ປະຊາຊົນບັນດາເຜົ່າ ແລະ ມວນຊົນທົ່ວໄປ. ຈາກນັ້ນ, ກໍ່ໄດ້ມີການສະແດງຫັດກາຍຂອງນັກຮຽນ ແລະ ກົມກອງອ້ອມຂ້າງແຂວງ.


ການຝຶກຊ້ອມໃຫຍ່ໃນຄັ້ງນີ້ ແມ່ນແນ່ໃສ່ເພື່ອເຮັດໃຫ້ແຕ່ ລະກ້ອນກຳລັງມີຄວາມພ້ອມ ທາງດ້ານຈັງຫວະ ແລະ ຮູບ ແບບຂອງການເດີນຂະບວນສວນສະຫນາມ ເພື່ອເຮັດໃຫ້ງານສະເຫຼີມສະຫຼອງ ວັນສ້າງຕັ້ງກອງທັບປະຊາຊົນລາວ ຄົບຮອບ 70 ປີ ຢູ່ແຂວງຫຼວງພະບາງ ມີຄວາມຄຶກຄື້ນ ແລະ ເຕັມໄປດ້ວຍຄວາມໝາຍຢ່າງເລິກເຊິ່ງ.


ສຳລັບການຝຶກຊ້ອມໃຫຍ່ຄັ້ງຕໍ່ໄປ ແມ່ນຈະມີຂຶ້ນຕື່ມໃນວັນທີ 22 ແລະ 23 ມັງກອນ, ກ່ອນທີ່ຈະຈັດງານສະເຫຼີມສະຫຼອງ ຢ່າງເປັນທາງການໃນວັນທີ່ 25 ມັງກອນ ປີ 2019 ນີ້.

ໂດຍ: ອາພຸດເດດ ບຸບຜາ

LEAVE A REPLY

Please enter your comment!
Please enter your name here