ທ່ານ ບຸນທອງ ຈິດມະນີ ເໜັ້ນ 4 ແຂວງພາກເໜືອສືບຕໍ່ຜັນຂະຫຍາຍມະຕິກອງປະຊຸມຄົບຄະນະຂອງຄະນະບໍລິຫານງານສູນກາງພັກຄັ້ງທີ 7 ສະໄໝທີ X ໃຫ້ທົ່ວເຖິງ

0
353

ກອງປະຊຸມເຜີຍແຜ່ເຊື່ອມຊຶມມະຕິກອງປະຊຸມຄົບຄະນະຂອງຄະນະບໍລິຫານງານສູນກາງພັກຄັ້ງທີ 7 ສະໄໝທີ X ໄດ້ໄຂຂື້ນໃນລະຫວ່າງວັນທີ 7-8 ມັງກອນ 2019 ທີ່ສະໂມສອນກອງບັນຊາການທະຫານ ແຂວງຫຼວງພະບາງ ພາຍໃຕ້ການເປັນປະທານຂອງ ສະຫາຍ ປອ. ບຸນທອງ ຈິດມະນີ ກໍາມະການກົມການເມືອງສູນກາງພັກ,ເລຂາທິການສູນກາງພັກ,ຮອງນາຍົກລັດຖະມົນຕີ,ປະທານຄະນະກວດກາສູນກາງພັກ,ປະທານອົງການກວດກາລັດຖະບານ ແລະ ຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ,ມີບັນດາເລຂາພັກແຂວງ-ເຈົ້າແຂວງ,ບັນດາຮອງເລຂາພັກແຂວງ-ຮອງເຈົ້າແຂວງ,ຄະນະບໍລິຫານງານພັກແຂວງ ແລະ ພະນັກງານຂັ້ນຄຸ້ມຄອງ ຈາກ 4 ແຂວງ ຄື: ແຂວງ ຫຼວງພະບາງ, ແຂວງ ໄຊລະບູລີ, ແຂວງ ຊຽງຂວາງ ແລະ ແຂວງ ຫົວພັນເຂົ້າຮ່ວມ ຈໍານວນ 123 ສະຫາຍ.

ພາຍຫຼັງສະຫາຍ ປອ ບຸນທອງ ຈິດມະນີ ຮອງນາຍົກລັດຖະມົນຕີ ໄດ້ເຜີຍແຜ່ເຊື່ອມຊຶມມະຕິຂອງຄະນະບໍລິຫານງານສູນກາງພັກຄັ້ງທີ 7 ສະໄໝທີ X ສະບັບເລກທີ 057/ຄບສພ ລົງວັນທີ 19 ທັນວາ 2018 ວ່າດ້ວຍການເພີ່ມທະວີການນໍາພາແກ້ໄຂຄວາມທຸກຍາກດ້ານເສດຖະກິດ-ການເງິນ ແລະ ສ້າງຄວາມເຂັ້ມແຂງ ກ່ຽວກັບການຄຸ້ມຄອງມະຫາພາກ ແລະ ມະຕິ ຂອງຄະນະບໍລິການງານສູນກາງພັກຄັ້ງທີ 7 ສະໄໜທີ X ສະບັບເລກທີ 056/ຄບສພ ລົງວັນທີ 19 ທັນວາ 2018 ວ່າດ້ວຍການປັບປຸງຮາກຖານການເມືອງ ຂອງລະບອບປະຊາທິປະໄຕ ປະຊາຊົນໃຫ້ເຂັ້ມແຂງ ແລະ ໜັກແໜ້ນ ເພື່ອແນໃສ່ໃຫ້ພະນັກງານການນໍາ 4 ແຂວງ ໄດ້ຮັບຮູ້,ເຂົ້າໃຈແຈ້ງກ່ຽວກັບສະພາບຄວາມຫຍຸ້ງຍາກທາງດ້ານເສດຖະກິດ-ການເງິນ ຂອງປະເທດ ໃນໄລຍະທີ່ຜ່ານມາ ແລະ ຜົນສະທ້ອນໃນສະເພາະໜ້າ ແລະ ຍາວນານ;

ກໍາແໜ້ນ, ເຊື່ອມຊຶມ ແລະ ເປັນເອກະພາບຢ່າງສູງກັບທັດສະນະທິດທາງ,ວິທີການ ແລະ ມາດຕະການທີ່ສູນກາງພັກວາງອອກ,ສ້າງຄວາມເຂົ້າໃຈເດັດດ່ຽວແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນໃນຕໍ່ໜ້າ ເພື່ອນໍາໄປຈັດຕັ້ງເຊື່ອມຊຶມຢູ່ແຂວງ,ເມືອງ ແລະ ຂັ້ນຮາກຖານຂອງຕົນແລ້ວ. ກອງປະຊຸມກໍໄດ້ພ້ອມກັນຄົ້ນຄວ້າ ປຶກສາຫາລືປະກອບຄໍາເຫັນບັນຫາທີ່ສໍາຄັນ ໃນຂົງເຂດເສດຖະກິດ-ການເງິນ ແລະ ຕໍ່ກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ການແກ້ໄຂບັນດາຈຸດອ່ອນ ຂໍ້ຄົງຄ້າງ, ຊອກໃຫ້ເຫັນບັນດາສາເຫດ ທີ່ເປັນພື້ນຖານ ແລະ ຕົ້ນຕໍ ເພື່ອເປັນມາດຕະການດໍາເນີນແກ້ໄຂໃນຕໍ່ໜ້າ,ຄົ້ນຄວ້າຕີລາຄາສະພາບການຈັດຕັ້ງປະຕິບັດ ວຽກງານຮາກຖານການເມືອງໃນໄລຍະຜ່ານມາ ແລະ ທິດທາງວຽກງານໃນຊຸມປີຕໍ່ໜ້າ. ພ້ອມທັງຄົ້ນຄວ້າກໍານົດບັນດາມາດຕະການໃຫ້ແທດກັບຕົວຈິງ ແລະ ມີປະສິດທິຜົນສູງ ເພື່ອແກ້ໄຂສະພາບການດັ່ງກ່າວ ສ້າງຂະບວນການຈັດຕັ້ງປະຕິບັດຢ່າງແຂງແຮງ, ທົ່ວເຖິງ ກໍ່ໃຫ້ເກີດມີການຫັນປ່ຽນຕົວຈິງ ທີ່ມີລັກສະນະບຸກທະລຸ ໃນທຸກຂົງເຂດວຽກງານ ເພື່ອຍູ້ແຮງການພັດທະນາໃນດ້ານຕ່າງໆ ໃຫ້ບັນລຸຄາດໝາຍທີ່ກອງປະຊຸມໃຫຍ່ຄັ້ງທີ X ຂອງພັກວາງອອກ.


ໂອກາດນີ້ ສະຫາຍ ປອ. ບຸນທອງ ຈິດມະນີ ກໍໄດ້ເໜັ້ນໃຫ້ການນໍາ 4 ແຂວງພາກເໜືອ ຮີບຮ້ອນຄົ້ນຄ້ວາ ຜັນຂະຫຍາຍຈັດຕັ້ງປະຕິບັດໃຫ້ໄວ,ທົ່ວເຖິງ ຕາມຄໍາສັ່ງຂອງຄະນະເລຂາທິການສູນກາງພັກ ວ່າດ້ວຍການເຊື່ອມຊຶມມະຕິ 7 ນີ້ໄດ້ກໍານົດໄວ້,ພາຍຫຼັງເຊື່ອມຊຶມທົ່ວເຖິງແລ້ວ ໃຫ້ຄົ້ນຄ້ວາຫັນເປັນອັນລະອຽດຂອງແຕ່ລະທ້ອງຖິ່ນ ໂດຍເອົາເຂົ້າໃນການກະກຽມກອງປະຊຸມໃຫຍ່ 3 ຂັ້ນຂອງອົງຄະນະພັກ ແລະ ເອົາເຂົ້າແຜນປະຈໍາປີ 2019ຂອງແຕ່ລະແຂວງ.


ຂ່າວ: ເພັດສາຄອນ ສິມມະວົງ,ຂ່າວສານຫລວງພະບາງ

LEAVE A REPLY

Please enter your comment!
Please enter your name here