ສສຂ ​ເມືອງ​ວຽງ​ໄຊ ຢ້ຽມຢາມ ກອງ​ບັນຊາ​ການ​ທະຫານ, ກອງຮ້ອຍ19 ​ແລະ ສູນ​ເສຍ​ອົງຄະ

0
137

ເນື່ອງໃນໂອກາດ ວັນສ້າງຕັ້ງກອງທັບປະຊາຊົນລາວ ຄົບຮອບ 70 ປີ ( 20 ມັງກອນ 1949 – 2019 ), ວັນທີ 7 ມັງກອນ 2019 ນຳໂດຍທ່ານ ນາງ ອຳໄພວອນ ລ້ອມບຸນແພງ ກຳມະການພັກແຂວງ ຮອງປະທານ ສພຂ ສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງ ເມືອງວຽງໄຊ ແລະ ທ່ານ ຄອນສີ ຈັນມະນີ ກຳມະການພັກເມືອງ ສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງ ເມືອງວຽງໄຊ ແຂວງຫົວພັນ ໄປພົບປະ ແລະ ຢ້ຽມຢາມ ກອງບັນຊາການທະຫານ ເມືອງວຽງໄຊ , ກອງຮ້ອຍ 19 ແລະ ພະນັກງານບຳນານ, ພະນັກງານເສຍອົງຄະສູນ11 ທີ່ເມືອງວຽງໄຊ.

ການໄປ ພົບປະຢ້ຽມຢາມ ຄັ້ງນີ້; ຍັງໄດ້ນຳເອົາ ກະຕ່າຂອງຂວັນ, ໝີ່ສຳເລັດຮູບ ມອບໃຫ້ກອງບັນຊາການທະຫານເມືອງວຽງໄຊ, ກອງຮ້ອຍ19 ແລະ ມອບເກີບຈຳນວນ 22 ຄູ່, ເສື້ອກັນໜາວ 25 ຜືນ ໃຫ້ພະນັກງານເສຍອົງຄະສູນ11, ລວມມູນຄ່າທັງໝົດ ສາມລ້ານກວ່າກີບ. ໂອກາດທີ່ມີຄວາມໝາຍສຳຄັນນີ້, ຄະນະທີມງານ ໃນນາມຕົວແທນຂອງປະຊາຊົນ ໂດຍສະເພາະຕາງໜ້າປະຊາຊົນເມືອງວຽງໄຊ ຂໍສະແດງຄວາມຍ້ອງຍໍຊົມເຊີຍຕໍ່ຜົນງານໄຊຊະນະໃນການປົກປັກຮັກສາປະເທດຊາດ ຂອງກຳລັງປ້ອງກັນຊາດ ທີ່ຍາດມາໄດ້ຕະຫຼອດໄລຍະ 70 ປີ ເຊິ່ງເປັນຜົນງານໄຊຊະນະອັນໃຫຍ່ຫຼວງ ເຖິງວ່າສະພາບການຂອງປະເທດຊາດ ກໍຄືຂອງແຂວງ ຈະມີຄວາມຫຍຸ້ງຍາກປານໃດກໍຕາມ ແຕ່ ກຳລັງປ້ອງກັນຊາດ ຍາມໃດກໍມີຄວາມສາມັກຄີ, ມີຄວາມເຂັ້ມແຂງ ສົມກັບຄຳວ່າ ເປັນຮົ້ວຂອງຊາດ ຢ່າງແທ້ຈິງ, ສາມາດຕໍ່ສູ້ ຍາດມາໄດ້ຜົນງານອັນໃຫຍ່ຫຼວງ ຈົນຮອດເທົ່າທຸກວັນນີ້; ພ້ອມດຽວກັນນີ້, ຍັງອວຍພອນພະນັກງານນັກຮົບ, ບັນດາທ່ານຄະນະພັກ, ຄະນະບັນຊາ ຕະຫຼອດຮອດ ນາຍ ແລະ ພົນທະຫານ ຈົ່ງມີແຕ່ຄວາມສຸກກາຍສະບາຍໃຈ ມີຜົນສຳເລັດໃນໜ້າທີ່ການງານ ແລະ ທ່ານຍັງໄດ້ສະແດງຄວາມຮູ້ບຸນຄຸນຢ່າງສູງ ຕໍ່ພະນັກງານບຳນານ ແລະ ພະນັກງານເສຍອົງຄະສູນ11 ທີ່ໄດ້ສະຫຼະຊີວິດສ່ວນຕົວ ເພື່ອສ່ວນລວມ ກໍຄື ເພື່ອປະເທດຊາດ; ພ້ອມທັງ, ຮຽກຮ້ອງໃຫ້ພະນັກງານບຳນານ, ພະນັກງານເສຍອົງຄະສູນ11 ຈົ່ງພ້ອມກັນເຊື່ອມຊຶມ ກົດໝາຍຕ່າງໆ, ສືບຕໍ່ຮັກສາມູນເຊື້ອຄວາມສາມັກຄີ, ມີແບບແຜນວິທີເຮັດວຽກ ແລະ ແບບແຜນການດຳລົງຊີວິດທີ່ດີ ໃຫ້ນັບມື້ດີຂຶ້ນກວ່າເກົ່າ.

ທີ່ມາ: ສະພາປະຊາຊົນແຂວງຫົວພັນ

ຂຽນໂດຍ ນາງ ປຸ້ຍນິຕາ ເພັງມີໄຊ

LEAVE A REPLY

Please enter your comment!
Please enter your name here